بھوبنیشور: محکمہ موسمیات ہند (آئی ایم ڈی) نے جمعہ کو اڈیشہ کے مختلف علاقوں میں شدید بارش کی وارننگ جاری کی ہے۔ آئی ایم ڈی کے بھوبنیشور مرکز نے دوپہر کے بلیٹن میں مایوربھنج ضلع میں دن کے دوران شدید بارش کی پیش گوئی کرتے ہوئے وہاں ’’ریڈ وارننگ‘‘ (کارروائی کے لیے تیار رہیں) جاری کی ہے۔

وارننگ کے پیش نظر مایوربھنج ضلع انتظامیہ نے تمام اسکولوں کو ہدایت دی ہے کہ وہ وقفے اور طلبہ میں مڈ ڈے میل کی تقسیم مکمل ہونے کے بعد دن کے لیے اسکول بند کر دیں۔ 19 اضلاع—بالاسور، بھدرک، کٹک، سندرگڑھ، انگول، ڈھینکنال، کیونجھڑ، سونپور، بودھ، بولانگیر، کالاہانڈی، کندھمال، گجپتی، گنجام، جھارسوگڑا، بارگڑھ، سنبھلپور، دیوگڑھ اور جاجپور—کے لیے ’’اورنج وارننگ‘‘ (کارروائی کے لیے تیار رہیں) جاری کی گئی ہے۔ اڈیشہ کے باقی 10 اضلاع—کیندرپاڑہ، جگت سنگھ پور، نوپاڑہ، نبرنگ پور، رائے گڑھ، کوراپٹ، مالکانگیری، پوری، خوردا اور نیاگڑھ—کو ’’یلو وارننگ‘‘ (محتاط رہیں) کے تحت رکھا گیا ہے۔

آئی ایم ڈی نے کہا کہ جمعہ کو ریاست میں گرج چمک کے ساتھ بجلی گرنے اور 30 سے 40 کلومیٹر فی گھنٹہ کی رفتار سے تیز ہواؤں کے چلنے کا امکان ہے۔ محکمے کے مطابق ریاست میں اتوار تک موسم کی صورتحال ایسی ہی رہنے کا امکان ہے۔ سمندری حالات انتہائی خراب رہنے کی پیش گوئی کے پیش نظر محکمہ موسمیات نے ماہی گیروں کو 7 اور 8 اگست کو اڈیشہ کے ساحل اور اس کے آس پاس سمندر میں جانے سے گریز کرنے کا مشورہ دیا ہے۔

جمعہ کی صبح 8:30 بجے تک گزشتہ 24 گھنٹوں کے دوران کالاہانڈی ضلع کے نرلا میں سب سے زیادہ 131 ملی میٹر بارش ریکارڈ کی گئی، جبکہ مدن پور-رام پور میں 117 ملی میٹر بارش ہوئی۔ دیگر مقامات جہاں 100 ملی میٹر سے زیادہ بارش ریکارڈ کی گئی، ان میں بولانگیر ضلع کا بیلگاؤں (115 ملی میٹر)، کٹک ضلع کا آٹھ گڑھ (112 ملی میٹر)، کٹک کا مہانگا (104 ملی میٹر) اور بولانگیر کا سلی بھٹا (103.4 ملی میٹر) شامل ہیں۔