نئی دہلی: بنگلورو میں بدھ کی شام ہونے والی شدید بارش نے تباہی مچا دی، جس میں 10 افراد کی موت ہو گئی۔ حکام نے یہ معلومات دی ہیں۔ حکام کے مطابق جمعرات کے روز بتایا گیا کہ شدید بارش کے ساتھ ژالہ باری اور تیز ہواؤں کے باعث درخت اکھڑ گئے، کئی اہم علاقوں میں پانی جمع ہو گیا اور ٹریفک نظام مکمل طور پر درہم برہم ہو گیا۔

بنگلورو کے بڑے حصوں میں تقریباً ایک گھنٹے تک اچانک اور تیز بارش ہوئی، جس کے نتیجے میں درخت اور بجلی کے کھمبے گر گئے اور نشیبی علاقوں میں پانی بھر گیا۔ متعدد سڑکیں زیرِ آب آنے کے باعث آمد و رفت مکمل طور پر متاثر ہوئی، جس سے رش کے اوقات میں ٹریفک بری طرح متاثر ہوا۔

موسلادھار بارش کے دوران بورنگ اینڈ لیڈی کرزن اسپتال کی ایک دیوار گرنے سے سات افراد جاں بحق ہو گئے، جن میں ایک چھ سالہ بچی بھی شامل ہے۔ حکام نے بتایا کہ مرنے والوں میں دو افراد کیرالہ سے تھے، جو مطالعاتی دورے پر آئے تھے۔ وہ دیوار کے پاس پناہ لیے ہوئے تھے کہ اچانک دیوار گر گئی۔ ایک اور واقعے میں 35 سالہ رگھو کی بنیرگھٹہ روڈ پر واقع ویگا سٹی مال کے قریب کرنٹ لگنے سے موت ہو گئی۔

پولیس کے مطابق یارب نگر میں ایک اور حادثے میں طالب علم سید سفیان بارش کے دوران موٹر سائیکل کھڑی کرتے وقت بجلی کے تار کے رابطے میں آنے سے ہلاک ہو گیا۔ چامراجپیٹ میں بھی ایک حادثے میں منجوناتھ نامی شخص موقع پر ہی جاں بحق ہو گیا، جب طوفان کے دوران گھر کی چھت کا ایک حصہ اچانک گر گیا۔