ممبئی/ آواز دی وائس

بالی وڈ کا مشہور گانا "کانٹا لگا" تو آپ کو ضرور یاد ہوگا، اور اسی گانے سے شہرت حاصل کرنے والی شیفالی جری والا اب ہمارے درمیان نہیں رہیں۔ محض 42 سال کی عمر میں اس چمکتے ہوئے ستارے نے دنیا کو الوداع کہہ دیا۔ جمعہ کی رات دیر گئے شیفالی کا انتقال ہو گیا، جس کے بعد اب یہ سوال اٹھ رہے ہیں کہ ان کی موت کی اصل وجہ کیا تھی۔

ابتدائی رپورٹس کے مطابق، شیفالی کی موت کی وجہ ہارٹ اٹیک بتائی جا رہی ہے۔ اطلاعات کے مطابق، جب انہیں دل کا دورہ پڑا تو ان کے شوہر پراگ تیاگی نے فوراً اسپتال پہنچایا، لیکن اسپتال پہنچتے ہی ڈاکٹروں نے انہیں مردہ قرار دے دیا۔

کیا واقعی ہارٹ اٹیک ہی موت کی وجہ ہے؟

شیفالی کی موت کے بعد شب 1 بجے ممبئی پولیس ان کے گھر پہنچی۔ پولیس کے ساتھ فارنزک ٹیم بھی موقع پر موجود تھی۔ گھر میں موجود افراد سے واقعے کی تفصیلات معلوم کی جا رہی ہیں۔ تفتیش جاری ہے تاکہ یہ واضح ہو سکے کہ موت کی وجہ واقعی دل کا دورہ تھا یا کچھ اور۔

پولیس کا مؤقف

ممبئی پولیس کا کہنا ہے کہ اداکارہ کی لاش ان کے اندھیری والے گھر سے ملی، اور ابھی تک ان کی موت کی وجہ واضح نہیں ہو سکی ہے۔ پولیس کو رات 1 بجے اطلاع ملی تھی۔ فی الحال شیفالی کی لاش کو پوسٹ مارٹم کے لیے کوپر اسپتال بھیج دیا گیا ہے، اور اصل وجہ پوسٹ مارٹم رپورٹ آنے کے بعد ہی سامنے آئے گی۔

کُک اور میڈ سے بھی ہو رہی ہے پوچھ گچھ

گھر میں موجود افراد سے اس بات کی جانچ کی جا رہی ہے کہ موت سے پہلے کیا ہوا، اور ان کی حالت کیسے بگڑی۔ اسی کے ساتھ شیفالی کے گھر کام کرنے والے کُک اور میڈ کو بھی رات میں امبولی پولیس اسٹیشن لے جایا گیا ہے تاکہ ان سے پوچھ گچھ کی جا سکے۔

ابتدائی رپورٹس میں موت کی وجہ ہارٹ اٹیک بتائی گئی ہے، لیکن پوسٹ مارٹم رپورٹ کے بعد ہی واضح ہو سکے گا کہ اچانک یہ سانحہ کیسے پیش آیا۔

ایک گانے نے دی شہرت

شیفالی جری والا کے انتقال سے نہ صرف ان کے مداح، بلکہ پوری انٹرٹینمنٹ انڈسٹری صدمے میں ہے۔ ہر کوئی حیران و غمزدہ ہے۔ شیفالی نے 2000 کی دہائی کے آغاز میں "کانٹا لگا" گانے کے ریمکس ویڈیو سے شہرت حاصل کی، جس کے بعد وہ "کانٹا لگا گرل" کے نام سے مشہور ہو گئیں۔ بعد میں وہ سلمان خان کی فلم مجھ سے شادی کروگی میں بھی نظر آئیں۔ اس کے علاوہ انہوں نے نچ بلیے اور بگ باس 13 جیسے ریئلٹی شوز میں بھی حصہ لیا، جہاں انہیں بے پناہ مقبولیت اور مداحوں کا پیار ملا۔