نئی دہلی: سپریم کورٹ 31 اگست کو اس درخواست پر سماعت کرے گی، جس میں سیاسی جماعتوں کو 2,000 روپے سے کم نقد چندہ قبول کرنے کی اجازت دینے والی انکم ٹیکس ایکٹ کی شق کی قانونی حیثیت کو چیلنج کیا گیا ہے۔ سپریم کورٹ کی 31 اگست کی کاز لسٹ کے مطابق اس درخواست پر جسٹس وکرم ناتھ اور جسٹس سندیپ مہتا کی بنچ سماعت کرے گی۔

سپریم کورٹ نے گزشتہ سال 24 نومبر کو درخواست پر سماعت کرنے پر رضامندی ظاہر کی تھی اور اس معاملے میں مرکزی حکومت اور دیگر فریقوں سے جواب طلب کیا تھا۔ درخواست میں دعویٰ کیا گیا ہے کہ شفافیت کی کمی انتخابی عمل کی سالمیت کو کمزور کرتی ہے، کیونکہ اس کے باعث ووٹرز سیاسی فنڈنگ کے ذرائع، عطیہ دینے والے افراد اور ان کے مقاصد سمیت اہم معلومات سے محروم رہتے ہیں۔

اس طرح ووٹرز ووٹ دیتے وقت منطقی، دانشمندانہ اور مکمل معلومات پر مبنی فیصلہ نہیں کر پاتے۔ کھیَم سنگھ بھاٹی کی جانب سے دائر درخواست میں الیکشن کمیشن کو یہ ہدایت دینے کی بھی اپیل کی گئی ہے کہ کسی سیاسی جماعت کی رجسٹریشن اور اسے انتخابی نشان الاٹ کرنے کی شرط کے طور پر یہ طے کیا جائے کہ کوئی بھی سیاسی جماعت نقد رقم کی شکل میں چندہ وصول نہیں کر سکتی۔

درخواست میں انکم ٹیکس ایکٹ، 1961 کی دفعہ 13 اے کی شق (ڈی) کو غیر آئینی قرار دے کر منسوخ کرنے کی اپیل کی گئی ہے۔ اس کے ساتھ ہی 2024 کے سپریم کورٹ کے اس فیصلے کا بھی حوالہ دیا گیا ہے، جس میں انتخابی بانڈ اسکیم کو منسوخ کر دیا گیا تھا۔ ایکٹ کی دفعہ 13 اے سیاسی جماعتوں کی آمدنی سے متعلق خصوصی دفعات سے متعلق ہے۔

درخواست میں کہا گیا ہے کہ ایکٹ میں دفعہ 13 اے شامل کی گئی ہے، جس کے تحت سیاسی جماعتوں کو حاصل ہونے والی رقم میں بینکوں میں جمع رقم پر سود، مکان یا جائیداد سے ہونے والی آمدنی، دیگر ذرائع سے حاصل ہونے والی آمدنی اور رضاکارانہ چندے کی کسی بھی رقم کو کل آمدنی کے حساب سے مستثنیٰ رکھا گیا ہے۔

درخواست میں یہ ہدایت دینے کی بھی اپیل کی گئی ہے کہ الیکشن کمیشن تمام تسلیم شدہ سیاسی جماعتوں کے فارم 24 اے (چندے کی تفصیلات) کی جانچ کرے اور جن چندوں میں عطیہ دہندہ کا پتہ یا پین نمبر درج نہیں ہے، ان رقوم کو متعلقہ سیاسی جماعتوں سے واپس جمع کرایا جائے۔ اس میں مرکزی بورڈ برائے براہِ راست ٹیکس (سی بی ڈی ٹی) کو گزشتہ پانچ برسوں کے دوران انکم ٹیکس ایکٹ کی مختلف دفعات کے تحت سیاسی جماعتوں کی جانب سے داخل کیے گئے انکم ٹیکس ریٹرن اور آڈٹ رپورٹس کی جانچ کرنے کی ہدایت دینے کی بھی اپیل کی گئی ہے۔