پریاگراج: اتر پردیش کے وارانسی میں واقع گیان واپی مسجد کے اندر مبینہ شِولنگ کو چھوڑ کر باقی علاقے کا اے ایس آئی سے سروے کرانے کی درخواست پر الہ آباد ہائی کورٹ نے منگل کو سماعت ملتوی کر دی اور اگلی تاریخ 10 نومبر مقرر کی۔
یہ معاملہ منگل کو جسٹس روہت رنجن اگروال کی عدالت میں سماعت کے لیے آیا، تو عدالت کو بتایا گیا کہ سال 2020 کی دیوانی رِٹ پٹیشن 1246 (اشونی اوپادھیائے بمقابلہ مرکز حکومت وغیرہ) میں سپریم کورٹ کے ذریعہ جاری عبوری حکم اب بھی مؤثر ہے۔
سپریم کورٹ نے اپنے عبوری حکم میں ہدایت دی تھی کہ اگرچہ نئے مقدمات دائر کیے جا سکتے ہیں، لیکن کسی بھی مقدمے کو رجسٹر نہیں کیا جائے گا اور اگلے حکم تک ان مقدمات کی سماعت نہیں کی جائے گی۔ اس کے علاوہ، سپریم کورٹ نے ہدایت دی تھی کہ ملک بھر کی کوئی بھی عدالت سروے وغیرہ کے احکامات سمیت کوئی مؤثر عبوری یا حتمی حکم جاری نہیں کرے گی۔
یہ نظرثانی کی درخواست وارانسی کے ضلع جج کے 21 اکتوبر 2023 کے حکم کو چیلنج کرتے ہوئے دائر کی گئی ہے، جس میں ضلع جج نے گیان واپی مسجد کے وُضو خانہ علاقے (مبینہ شِولنگ کو چھوڑ کر) کا سروے کرانے کے لیے اے ایس آئی کو ہدایت دینے سے انکار کیا تھا۔
وارانسی کی عدالت میں شرنگار گوری کی پوجا آرچنا مقدمہ میں شامل مدعیوں میں سے ایک راکھی سنگھ نے اپنی نظرثانی کی درخواست میں دلائل دیے ہیں کہ عدالتی مفاد میں وُضو خانہ علاقے کا سروے ضروری ہے کیونکہ اس سے عدالت کو فیصلہ کرنے میں مدد ملے گی۔
انہوں نے یہ بھی کہا کہ وُضو خانہ علاقے کا اے ایس آئی سے سروے ضروری ہے کیونکہ اس سے مجموعی جائیداد کی مذہبی نوعیت کا تعین ممکن ہو سکے گا۔ قابل ذکر ہے کہ بھارتی آثارِ قدیمہ سروے (ASI) نے وارانسی میں گیان واپی کمپلیکس کا پہلے ہی سروے کر لیا ہے اور وارانسی کے ضلع جج کو اپنی رپورٹ فراہم کر دی ہے۔ اے ایس آئی نے وارانسی کے ضلع جج کے 21 جولائی 2023 کے حکم کے تحت سروے کیا تھا۔
