گاندھی نگر (گجرات): ریاستی حکومت کے مطابق، گجرات میں گزشتہ دو برسوں کے دوران کچے ناریل کی پیداوار میں تقریباً 20 فیصد اضافہ ریکارڈ کیا گیا ہے، جس کے بعد سالانہ پیداوار تقریباً 26 کروڑ ناریل تک پہنچ گئی ہے۔ گجرات سی ایم او کی پریس ریلیز کے مطابق یہ اضافہ ریاستی حکومت کی جانب سے باغبانی، ویلیو ایڈڈ زراعت اور جدید زرعی طریقوں کے فروغ کی کوششوں کا نتیجہ ہے، جو ٹیکنالوجی پر مبنی اور برآمدی زرعی نظام کی وسیع حکمتِ عملی کا حصہ ہے۔

پریس ریلیز میں کہا گیا ہے کہ بھارت کا زرعی شعبہ تیزی سے روایتی زراعت سے جدید، ٹیکنالوجی پر مبنی اور برآمدی زراعت کی طرف بڑھ رہا ہے۔ گجرات کی وسیع ساحلی پٹی ناریل کی کاشت کے لیے انتہائی موزوں ہے، جس سے کسانوں کو براہِ راست فائدہ حاصل ہو رہا ہے۔ رپورٹ کے مطابق کچے ناریل کی بڑھتی ہوئی طلب اور ساحلی علاقوں میں کاشت کے پھیلاؤ کے باعث گجرات نے ناریل کی پیداوار میں ریکارڈ اضافہ حاصل کیا ہے۔

پریس ریلیز میں بتایا گیا ہے کہ گزشتہ دو سالوں میں ناریل کی پیداوار میں تقریباً 20 فیصد اضافہ ہوا ہے اور اب کسان سالانہ تقریباً 26 کروڑ ناریل پیدا کر رہے ہیں۔ ناریل کی کاشت تقریباً 28 ہزار ہیکٹر رقبے پر کی جا رہی ہے، جس میں گِر سومناتھ، جوناگڑھ، بھاو نگر، ولساد، ناوساری، کچھ اور دیو بھومی دوارکا اہم کردار ادا کر رہے ہیں۔ 2024-25 کے اعداد و شمار کے مطابق ریاست میں اوسط پیداوار تقریباً 9.26 ہزار ناریل فی ہیکٹر ہے۔

ریلیز میں مزید کہا گیا ہے کہ ریاستی حکومت ناریل کی کاشت کے لیے 75 فیصد تک سبسڈی فراہم کر رہی ہے۔ باغبانی محکمہ کسانوں کو تربیت اور آگاہی پروگراموں کے ذریعے باغبانی فصلوں اور ویلیو ایڈیشن کی طرف راغب کر رہا ہے۔ پیداوار بڑھانے کے لیے کسانوں کو ملچنگ اور انٹیگریٹڈ پیسٹ مینجمنٹ جیسے طریقے اپنانے کی ترغیب دی جا رہی ہے۔

اس کے علاوہ نرسریاں بلند قامت، بونا اور ہائبرڈ ناریل اقسام کے معیاری پودے فراہم کر رہی ہیں، جبکہ گجرات گرین ریولوشن کمپنی لمیٹڈ ڈرِپ اریگیشن سسٹم کے لیے مالی معاونت بھی فراہم کر رہی ہے۔ رپورٹ میں یہ بھی بتایا گیا کہ چورواڑ سے اُنا تک کے ساحلی علاقے، جسے “لیلی ناگھر” کہا جاتا ہے، گزشتہ دو سالوں سے سفید مکھی کے شدید حملے کا سامنا کر رہے ہیں، تاہم حکومت اور کسانوں کی کوششوں سے صورتحال میں بہتری آئی ہے۔

سوترپڑا کے ایک نوجوان کسان دنیش سولنکی نے اس مسئلے کا ایک آسان حل نکالا، جس میں انہوں نے 1000 لیٹر پانی میں گڑ اور گِر گائے کے دودھ کا مکسچر استعمال کیا۔ اس طریقے کے بعد ان کی پیداوار 1000–1500 ناریل سالانہ سے بڑھ کر 8000–10000 تک پہنچ گئی اور آمدنی 12 سے 15 لاکھ روپے سالانہ ہو گئی۔

آخر میں پریس ریلیز میں کہا گیا ہے کہ وزیر اعلیٰ بھوپندر پٹیل کی قیادت میں حکومت کا ہدف ناریل کی کاشت کو مستقبل میں 70 ہزار ہیکٹر تک بڑھانا ہے، جبکہ ناریل کی ویلیو ایڈیشن اور برآمدات کو بھی فروغ دیا جا رہا ہے، تاکہ گجرات کو ناریل پر مبنی صنعتوں کا عالمی مرکز بنایا جا سکے۔