نئی دہلی: حکومت نے غیر ملکی ادارہ جاتی سرمایہ کاروں (ایف آئی آئی) کی جانب سے سرکاری سیکیورٹیز (جی سیک) میں کی گئی سرمایہ کاری پر طویل مدتی کیپٹل گین ٹیکس (ایل ٹی سی جی) ختم کرنے کا فیصلہ کیا ہے۔ اس سلسلے میں جمعہ کو ایک آرڈیننس جاری کیا گیا، جس کا مقصد ملک میں ڈالر کی آمد بڑھانا اور غیر ملکی سرمایہ کاری کو فروغ دینا ہے۔

آرڈیننس کے ذریعے انکم ٹیکس ایکٹ میں ترمیم کرتے ہوئے یہ رعایت فراہم کی گئی ہے۔ حکومت کا کہنا ہے کہ طویل مدتی اور مستحکم سرمایہ کاری کو راغب کرنے کے لیے سرکاری سیکیورٹیز پر کیپٹل گین ٹیکس ختم کیا گیا ہے، کیونکہ ان سرمایہ کاری ذرائع کی مدت نسبتاً زیادہ ہوتی ہے۔ یہ فیصلہ ایسے وقت میں سامنے آیا ہے جب غیر ملکی سرمایہ کار رواں سال اب تک مقامی شیئر بازار سے تقریباً 2.6 لاکھ کروڑ روپے نکال چکے ہیں، جو 2025 میں نکالی گئی 1.66 لاکھ کروڑ روپے کی رقم سے کہیں زیادہ ہے۔

ماہرین کے مطابق اس کی بڑی وجہ عالمی اقتصادی غیر یقینی صورتحال ہے۔ صرف جون کے ابتدائی تین دنوں میں ہی غیر ملکی سرمایہ کاروں نے تقریباً 34 ہزار کروڑ روپے کے شیئر فروخت کیے، جس سے بھارتی روپے پر مزید دباؤ بڑھ گیا۔ اگرچہ غیر ملکی سرمایہ کاروں نے مکمل رسائی راستے (ایف اے آر) کے تحت قرض بازار میں 17 ہزار کروڑ روپے سے زائد کی سرمایہ کاری کی ہے، تاہم عام قرض حد کے تحت تقریباً 4 ہزار کروڑ روپے اور رضاکارانہ برقرار رکھنے کے راستے (وی آر آر) کے ذریعے 340 کروڑ روپے کی رقم نکالی گئی ہے۔ فی الحال غیر ملکی سرمایہ کاروں کو ایکویٹی اور قرض سرمایہ کاری سے حاصل ہونے والے منافع پر 12.5 فیصد طویل مدتی کیپٹل گین ٹیکس ادا کرنا پڑتا ہے۔

یاد رہے کہ جولائی 2024 کے مرکزی بجٹ میں وزیرِ خزانہ نرملا سیتا رمن نے بیشتر اثاثوں پر ایل ٹی سی جی کی شرح 10 فیصد سے بڑھا کر 12.5 فیصد کر دی تھی، جبکہ درج شدہ حصص پر قلیل مدتی کیپٹل گین ٹیکس (ایس ٹی سی جی) انکم ٹیکس ایکٹ کی دفعہ 111 اے کے تحت 15 فیصد مقرر ہے۔ روپے کی قدر میں مسلسل گراوٹ اور ریکارڈ کم سطح تک پہنچنے کے بعد حکومت اور متعلقہ اداروں نے صورتحال کو سنبھالنے کی کوششیں تیز کر دی ہیں۔

گزشتہ ماہ وزیرِ اعظم نریندر مودی نے مغربی ایشیا کے بحران کے باعث خام تیل کی درآمدی لاگت بڑھنے کے تناظر میں عوام سے زرمبادلہ کی بچت کی اپیل بھی کی تھی۔ ماہرین کے مطابق امریکی تجارتی محصولات، غیر ملکی سرمایہ کے ریکارڈ انخلا اور درآمدی بل میں اضافے جیسے عوامل بھارتی کرنسی کو کمزور کر رہے ہیں اور ملکی مالیاتی نظام پر دباؤ بڑھا رہے ہیں۔ بھارتی ریزرو بینک عموماً ڈالر کے مقابلے میں روپے کی قدر میں شدید اتار چڑھاؤ کو قابو میں رکھنے کے لیے اپنے زرمبادلہ کے ذخائر استعمال کرتا ہے۔