نئی دہلی: سابق آل راؤنڈر عرفان پٹھان کا ماننا ہے کہ شبھمن گل کی خراب فارم نہ صرف ان پر ذاتی طور پر بلکہ ٹیم مینجمنٹ پر بھی دباؤ بڑھا رہی ہے۔ پٹھان نے جیو ہاٹ اسٹار پر کہا کہ سنجو سیمسن کو واپس لا کر پہلے والے کامیاب اوپننگ کمبی نیشن کو بحال کرنا بھی آسان نہیں ہوگا، کیونکہ کیرالہ کے اس کھلاڑی کو بھی اپنی تال واپس پانے میں تھوڑا وقت لگے گا۔
بھارت کے لیے ٹی20 میں اوپنر کے طور پر سیمسن نے کافی کامیابی حاصل کی تھی۔ بعد میں جب گل کو ٹی20 کا نائب کپتان بنایا گیا تو سیمسن کی جگہ انہیں اوپنر کے طور پر اتارا گیا۔ بھارت کی ٹیسٹ اور ون ڈے ٹیم کے کپتان گل تاہم کھیل کے سب سے چھوٹے فارمیٹ میں رنز بنانے کے لیے جدوجہد کر رہے ہیں۔
جنوبی افریقہ کے خلاف دوسرے ٹی20 میچ میں وہ صفر پر آؤٹ ہو گئے۔ پٹھان نے کہا، شبھمن گل کہہ سکتے ہیں کہ وہ بہت اچھی گیند پر آؤٹ ہوئے، لیکن اگر وہ فارم میں ہوتے تو اس گیند کو آسانی سے کھیل لیتے۔ وہ فارم میں نہیں ہیں۔ جہاں تک کپتان سوریہ کمار یادو کی بات ہے تو مجھے لگتا ہے کہ انہیں اپنے آف سائیڈ کے کھیل پر توجہ دینے کی ضرورت ہے۔ جب وہ آؤٹ ہوئے تو ان کی پوزیشن بالکل غلط تھی۔
انہوں نے کہا، گل کا رنز نہ بنانا ایک خراب علامت ہے اور اس سے ان پر اور ٹیم مینجمنٹ پر دباؤ بڑھ رہا ہے۔ وہ سوچ رہے ہوں گے کہ کیا کیا جائے۔ یہ صورتحال مزید بگڑنی نہیں چاہیے۔ پٹھان نے کہا، اگر گل پھر بھی رنز نہیں بنا پا رہے ہیں تو آپ سنجو سیمسن کو واپس لا کر ان سے فوراً بہترین کارکردگی کی امید نہیں کر سکتے، خاص طور پر جب وہ خود بھی لَے میں نہ ہوں۔ اس سے کئی سوال پیدا ہو گئے ہیں۔ اگر وہ سیمسن کو پلینگ الیون میں واپس لاتے ہیں تو ان کے لیے رنز بنانا بہت اہم ہو جاتا ہے۔
انہوں نے سوریہ کمار کی مشکلات کا بھی ذکر کیا، جو کپتانی سنبھالنے کے بعد سے کوئی بڑا اسکور نہیں کر پائے ہیں۔ پٹھان نے کہا، سوریہ پر دباؤ ہوگا کیونکہ وہ کپتان ہیں اور کپتان ہونے کی وجہ سے آپ کی جگہ فائنل الیون میں خود بخود پکی ہو جاتی ہے۔ ایک کھلاڑی کے طور پر اگر آپ نے ایک سال سے رنز نہ بنائے ہوں، تو آپ دباؤ میں ہوتے ہیں۔
انہوں نے مزید کہا،ورلڈ کپ (اگلے سال فروری-مارچ میں) سے پہلے انہیں اپنی فارم میں واپسی کرنی ہوگی۔ انہیں درست بیٹنگ پوزیشن اور بہتر شاٹ سلیکشن کی ضرورت ہے۔ سوریہ لیگ سائیڈ کی طرف سیدھی گیند پر آؤٹ ہو رہے ہیں۔ جب آپ اس طرح آؤٹ ہو رہے ہیں تو آپ کو آف سائیڈ میں زیادہ کھیلنے کی کوشش کرنی چاہیے۔
