نئی دہلی: آگرہ میں میٹرو ریل کی تعمیر کے دوران گیس پائپ لائن کے متاثر ہونے سے گیس کا رساؤ شروع ہو گیا، جس کے بعد احتیاطی طور پر آس پاس کے علاقے کو خالی کرانا پڑا۔ حکام نے جمعہ کو یہ اطلاع دی۔ حکام کے مطابق یہ واقعہ جمعرات کی رات تقریباً 9 بجے اتماد الدولہ تھانہ علاقے میں رام باغ چوراہے کے قریب پیش آیا۔

اس وقت کھدائی کے دوران گیس پائپ لائن متاثر ہو گئی اور اس سے گیس کا رساؤ ہونے لگا۔ گیس رساؤ کے بعد احتیاط کے طور پر آس پاس کا علاقہ خالی کرا لیا گیا اور متاثرہ علاقوں میں گیس کی سپلائی بھی روک دی گئی۔

فائر بریگیڈ کے اہلکار اور گیل (انڈیا) لمیٹڈ کے افسران موقع پر پہنچے اور گیس رساؤ روکنے کے لیے اقدامات کیے۔ گیل (انڈیا) لمیٹڈ کے ڈپٹی جنرل منیجر اوم ویر سنگھ نے کہا کہ میٹرو تعمیراتی کام کے دوران لاپروائی کے باعث پائپ لائن متاثر ہوئی۔ انہوں نے بتایا کہ مرمت کا کام مکمل کرنے کے لیے گیس کی سپلائی روک دی گئی ہے۔