شیوموگا/ آواز دی وائس
مرکزی وزیر برائے سڑک ٹرانسپورٹ و شاہراہیں نتن گڈکری نے پیر کے روز کرناٹک کے ضلع شیوموگا میں ملک کے دوسرے سب سے طویل کیبل پر مبنی سگندور پل کا افتتاح کیا۔
اس تقریب میں بھارتیہ جنتا پارٹی (بی جے پی) کے سینئر رہنماؤں نے شرکت کی، لیکن ریاستی کابینہ کا کوئی بھی وزیر موجود نہیں تھا۔
افسران کے مطابق، اس پل کی تعمیر ضلع کے ساگرہ تعلقہ میں امبرگوڈلو-کلاسوالی کے درمیان شراوتی بیک واٹر پر کی گئی ہے، جس پر کل 472 کروڑ روپے کی لاگت آئی ہے۔ اس پل کے بننے سے ساگرہ اور سگندور کے آس پاس کے دیہاتوں کے درمیان فاصلہ کافی کم ہو جائے گا۔ سگندور چودیشوری مندر کے لیے مشہور ہے، اور پل سے یہاں کی رسائی آسان ہو جائے گی۔
اس افتتاحی تقریب میں مرکزی وزیر پرهلاد جوشی، بی جے پی کے سینئر لیڈر بی ایس یدی یورپا سمیت دیگر شخصیات موجود تھیں۔
تاہم، نہ تو وزیر اعلیٰ سدارامیا اور نہ ہی ان کی کابینہ کا کوئی بھی وزیر اس پروگرام میں شریک ہوا۔ حال ہی میں وزیر اعلیٰ سدارامیا نے نتن گڈکری سے اپیل کی تھی کہ وہ 14 جولائی کو شیوموگا کے ساگرہ تعلقہ میں ہونے والے اس پل کے افتتاح اور دیگر بنیادی ڈھانچے سے متعلق سنگ بنیاد کی تقریبات کو ملتوی کریں، کیونکہ انہیں اس کی پیشگی اطلاع نہیں دی گئی تھی۔
وزیر اعلیٰ نے گڈکری کو خط لکھ کر کہا تھا کہ اسی دن ان کا وجے پورا ضلع کے انڈی تعلقہ کا طے شدہ دورہ ہے، جہاں وہ مختلف ترقیاتی منصوبوں کا افتتاح کریں گے۔ انہوں نے کہا کہ اگر وزارت سڑک ٹرانسپورٹ و شاہراہیں ایسے پروگراموں کے انعقاد سے پہلے ریاستی حکومت سے مشورہ کرتی، تو یہ زیادہ موزوں ہوتا۔ ساتھ ہی انہوں نے گڈکری سے اس بابت افسران کو مناسب ہدایات دینے کی بھی اپیل کی۔
