نئی دہلی/ آواز دی وائس
دہلی کی وزیر اعلیٰ ریکھا گپتا نے جمعرات کو کہا کہ شہری فرائض کی پاسداری کرنا، کچرا پھیلانے سے گریز کرنا اور سڑک کی حفاظت کے لیے ہیلمٹ کا استعمال کرنا جیسے چھوٹے چھوٹے کام بھی حب الوطنی کی عکاسی کرتے ہیں۔
دہلی حکومت کی جانب سے منعقدہ سڑک سلامتی آگاہی مہم کے تحت گپتا نے رکن پارلیمنٹ بانسری سواراج، دہلی کے وزیر ٹرانسپورٹ پنکج سنگھ اور چیف سکریٹری دھرمیندر کے ساتھ ’کنّاٹ پلیس‘ میں ہیلمٹ کے استعمال پر زور دینے کے لیے ایک پروگرام میں شرکت کی۔
گپتا نے کہا کہ یومِ آزادی کی پیشی پر آئیے ہم یہ عہد کریں کہ سڑک سلامتی کے اصولوں کی پابندی کریں گے اور اپنے شہر میں صفائی ستھرائی قائم رکھیں گے۔
نوجوانوں سے سڑک کے حفاظتی اقدامات پر عمل کرنے کی اپیل کرتے ہوئے وزیر اعلیٰ نے کہا کہ وہی ملک کو آگے لے جائیں گے، اس لیے دو پہیہ گاڑی چلاتے یا اس پر سوار ہوتے وقت ہیلمٹ پہنیں اور اس کا فیتہ اچھی طرح باندھیں تاکہ ہیلمٹ مضبوطی سے بندھا رہے۔
انہوں نے کہا، ’’میں ہمیشہ کہتی ہوں کہ شاید ہمیں اپنے بہادر فوجیوں کی طرح سرحد پر جا کر گولیوں کا سامنا کرنے اور اپنی حب الوطنی دکھانے کا موقع نہ ملے، لیکن ہم ان چھوٹے چھوٹے اقدامات سے اپنی حب الوطنی ظاہر کر سکتے ہیں۔ صفائی قائم رکھنا، لوگوں کی مدد کرنا، ہیلمٹ کا استعمال اور ٹریفک و سڑک سلامتی کے اصولوں پر عمل کرنا بھی حب الوطنی اور وطن سے محبت کا اظہار ہے۔
بانسری سواراج نے نوجوانوں کو ہیلمٹ پہننے کی ترغیب دیتے ہوئے اسے فیشن کی دیگر چیزوں کی طرح اپنانے کا مشورہ دیا۔ وزیر ٹرانسپورٹ پنکج سنگھ نے کہا کہ دہلی کی حفاظت یہاں کے شہریوں کے ہاتھ میں ہے۔
انہوں نے کہا کہ آئیے ہم اپنے آپ سے وعدہ کریں کہ ہم ایسا کچھ نہیں کریں گے جس سے حفاظت پر سمجھوتہ ہو اور یہ بھی یقینی بنائیں کہ ہمارے دوست اور اہل خانہ بھی سڑک کے حفاظتی اصولوں پر عمل کریں۔
