نئی دہلی: وزارتِ خارجہ (ایم ای اے) نے منگل کو اعلان کیا کہ فرانس کے صدر ایمانوئیل میکرون 17 فروری سے بھارت کے تین روزہ دورے پر آئیں گے۔ اپنے دورے کے دوران صدر میکرون وزیر اعظم نریندر مودی کے ساتھ مختلف اہم امور پر تفصیلی بات چیت کریں گے، اس کے علاوہ وہ اے آئی امپیکٹ سمٹ میں بھی شرکت کریں گے۔

وزارتِ خارجہ کے مطابق، دونوں رہنما مختلف شعبوں میں دوطرفہ تعاون کو مزید مضبوط بنانے پر تبادلۂ خیال کریں گے۔ اس کے علاوہ، دونوں قائدین باہمی دلچسپی کے علاقائی اور عالمی امور پر بھی گفتگو کریں گے، جن میں انڈو پیسیفک خطے میں تعاون بھی شامل ہے۔ وزارتِ خارجہ کے بیان کے مطابق، وزیر اعظم مودی اور صدر میکرون ممبئی میں بھی موجود ہوں گے، جہاں وہ مشترکہ طور پر ’انڈیا-فرانس ایئر آف انوویشن‘ کا افتتاح کریں گے۔