گورکھپور/ آواز دی وائس
وزیر اعلیٰ یوگی آدتیہ ناتھ نے بدھ کے روز افسران کو ہدایت دی کہ اگر کسی دبنگ نے غریبوں کی زمین پر غیر قانونی قبضہ کیا ہے تو فوراً زمین کو قبضہ مافیا سے آزاد کرایا جائے اور اس کے خلاف سخت قانونی کارروائی کی جائے۔ یہ اطلاع ایک سرکاری بیان میں دی گئی۔
وزیر اعلیٰ یوگی آدتیہ ناتھ نے صبح گورکھ ناتھ مندر کے احاطے میں واقع مہنت دگ وجے ناتھ اسمرتی سبھاگار کے باہر تقریباً 200 فریادیوں سے ملاقات کی اور یقین دلایا کہ حکومت ہر مظلوم کی پریشانی کو حل کرنے کے لیے پرعزم ہے۔
انہوں نے افسران کو ہدایت دیتے ہوئے کہا کہ جو لوگ کسی زمین پر غیر قانونی قبضہ کرتے ہیں اور کمزوروں کو بے گھر کرتے ہیں، انہیں کسی بھی صورت میں بخشا نہ جائے۔ ان کے خلاف قانون کے مطابق سخت کارروائی کی جائے۔ حکومت پرعزم ہے کہ کسی کے ساتھ ناانصافی نہ ہو اور ہر شخص کی زندگی میں خوشحالی آئے۔
وزیر اعلیٰ نے عوامی درشن میں موصول ہونے والی تمام درخواستیں متعلقہ افسران کے حوالے کرتے ہوئے فوری اور تسلی بخش نپٹارے کی ہدایت دی۔ عوامی درشن کے دوران ایک خاتون نے دبنگوں کے ذریعہ اس کی زمین پر غیر قانونی قبضے کی شکایت کی، جس پر وزیر اعلیٰ نے انتظامیہ اور پولیس کے افسران کو ہدایت دی کہ شکایت پر فوری کارروائی کریں اور یہ یقینی بنائیں کہ کوئی دبنگ کسی کی زمین پر قبضہ نہ کر سکے۔
وزیر اعلیٰ کے سامنے کئی لوگ علاج کے لیے مالی امداد کی فریاد لے کر بھی پہنچے۔ اس پر یوگی نے یقین دہانی کرائی کہ حکومت ہر ممکن مدد فراہم کرے گی۔ انہوں نے ریونیو اور پولیس سے متعلق معاملات کو پوری شفافیت اور غیر جانب داری سے نمٹانے کی ہدایت دی اور کہا کہ ہر مظلوم کے ساتھ حساس رویہ اختیار کیا جائے۔
عوامی درشن میں کچھ لوگ اپنے بچوں کے ساتھ بھی پہنچے تھے۔ وزیر اعلیٰ نے بچوں کو پیار سے نوازا، ان سے ان کے نام اور اسکول کے بارے میں پوچھا اور انہیں چاکلیٹ دی۔ انہوں نے بچوں کو دل لگا کر پڑھائی کرنے کی ترغیب دی۔
