ماسکو/ آواز دی وائس

روس اور یوکرین نے ایک دوسرے پر رات بھر فضائی حملے کیے، جن کے نتیجے میں دونوں ممالک میں دو، دو افراد ہلاک ہو گئے۔ حکام نے اس کی تصدیق کی ہے۔ مقامی حکام کے مطابق، یوکرین کے جنوبی ڈنیپرو اور شمال مشرقی سومی علاقوں پر راکٹ اور ڈرونز سے مشترکہ حملے کیے گئے۔ ڈنیپرو کے علاقائی انتظامیہ کے سربراہ سرہی لِساک نے بتایا کہ اس حملے میں کم از کم دو افراد ہلاک اور پانچ دیگر زخمی ہوئے۔

ڈنیپرو شہر میں حملے کے دوران ایک کثیر منزلہ عمارت اور تجارتی ادارہ نقصان کا شکار ہوا، جبکہ ایک شاپنگ سینٹر میں آگ لگ گئی۔ فوجی انتظامیہ کا کہنا ہے کہ سومی میں تین افراد زخمی ہوئے۔ خارکیف شہر میں رات بھر شدید فضائی بمباری کی گئی۔ مقامی حکام کے مطابق، یوکرین کے دوسرے سب سے بڑے شہر پر تین گھنٹے کے دوران چار گائیڈڈ فضائی بم، دو بیلسٹک میزائل اور 15 ڈرونز سے حملہ کیا گیا۔

ٹیلیگرام پر ایک پوسٹ میں خارکیف کے میئر ایہور تیریکھو نے کہا کہ حملے میں اونچی رہائشی عمارتیں، مقامی کاروبار، سڑکیں اور مواصلاتی نیٹ ورک متاثر ہوئے۔یوکرین کی فضائیہ کی یومیہ رپورٹ کے مطابق، روس نے رات بھر میں مجموعی طور پر 208 ڈرونز اور 27 میزائل یوکرین پر داغے۔ رپورٹ میں بتایا گیا کہ ابتدائی معلومات کے مطابق، فضائی دفاعی نظام اور الیکٹرانک جنگی نظام نے 183 ڈرونز اور 17 میزائلوں کو تباہ یا ناکام بنایا، لیکن نو مقامات پر 10 میزائل اور 25 ڈرونز نے حملے کیے۔

ماسکو کے حکام نے اطلاع دی ہے کہ یوکرینی ڈرونز نے رات کے وقت روس کے متعدد علاقوں کو نشانہ بنایا۔ عبوری گورنر یوری سلوسار کے مطابق، یوکرین کی سرحد سے ملحق روس کے روستو علاقے میں ایک ڈرون حملے میں دو افراد ہلاک ہو گئے۔

گورنر ولادیمیر ولادیمیروف نے ٹیلیگرام پر بتایا کہ پڑوسی اسٹاوروپول علاقے میں ایک نامعلوم صنعتی مرکز پر ڈرون حملہ ہوا، تاہم انہوں نے اس مقام کی درست تفصیل نہیں دی۔ ماسکو کے میئر سرگئی سوبیانن کے مطابق، ماسکو کو بھی ڈرون سے نشانہ بنایا گیا، لیکن اسے مار گرایا گیا۔ گورنر اولیگ میلنیچینکو کے مطابق، دارالحکومت کے جنوب مشرق میں واقع پینزا علاقے میں ایک نامعلوم صنعتی مرکز کو نشانہ بنایا گیا۔

روسی وزارتِ دفاع کے مطابق، اس کے فضائی دفاعی دستوں نے مجموعی طور پر 54 یوکرینی ڈرونز کو مار گرایا یا انہیں روکا۔ روس کے مطابق، یوکرین کی سرحد سے متصل برائنسک علاقے میں 24، روستو میں 12، کریمیا جزیرہ نما میں 6، بحیرہ آزوف میں 4، بحیرہ اسود میں 3، اور اورلوف، تُولا اور بیلگورود علاقوں میں متعدد دیگر ڈرونز کو تباہ یا ناکارہ بنایا گیا۔