نئی دہلی: حکومت نے جمعہ کے روز ایک تاریخی فیصلے کے تحت تمام چار لیبر کوڈز کو باضابطہ طور پر نافذ کر دیا۔ اس بڑے اصلاحاتی قدم کے ذریعے موجودہ 29 مزدور قوانین کو سادہ، منظم اور معقول بنایا گیا ہے۔ ان نئی قوانین میں گِگ ورکروں یعنی مختصر مدتی معاہدے پر کام کرنے والے ملازمین کے لیے عالمگیر سماجی تحفظ، تمام کارکنوں کے لیے لازمی تقرری نامہ، ہر شعبے میں قانونی کم از کم اجرت اور وقت پر مزدوری کی ادائیگی جیسے اہم انتظامات شامل ہیں۔

یہ چار لیبر کوڈز یہ ہیں: وژ ہ کوڈ، 2019 ، انڈسٹریل ریلیشنز کوڈ، 2020 ، سوشَل سکیورٹی کوڈ، 2020 اور اوکیوپیشنل سیفٹی، ہیلتھ اینڈ ورکنگ کنڈیشنز کوڈ، 2020۔ اصلاحات میں خواتین کے لیے بھی زیادہ حقوق اور بہتر تحفظ فراہم کیا گیا ہے۔ ان میں رات کی شفٹ میں کام کی اجازت، 40 سال سے زیادہ عمر کے کارکنوں کے لیے سالانہ مفت طبی جانچ، خطرناک صنعتوں سمیت پورے ملک میں ای ایس آئی سی کا دائرہ بڑھانا، اور ایک ہی رجسٹریشن و لائسنسنگ نظام جیسے اقدامات شامل ہیں۔

وزیر اعظم نریندر مودی نے سوشل میڈیا پلیٹ فارم ’ایکس‘ پر لکھا کہ یہ لیبر کوڈز "ہمارے لوگوں، بالخصوص ناری شکتی اور یوا شکتی کے لیے عالمی سطح کا سماجی تحفظ، کم از کم اجرت، وقت پر ادائیگی، محفوظ کام کی جگہ اور ترقی کے بے شمار مواقع فراہم کرنے کی مضبوط بنیاد ثابت ہوں گے۔"

انہوں نے مزید کہا کہ یہ قوانین مزدوروں کے حقوق کے تحفظ کے ساتھ ساتھ بھارت کی معاشی ترقی کو بھی مضبوط کریں گے، روزگار کے مواقع میں اضافہ ہوگا، پیداواریت بڑھے گی اور ’وِکست بھارت‘ کے سفر کو رفتار ملے گی۔ مودی نے اسے آزادی کے بعد کے سب سے بڑے اور دور رس مزدور دوست اصلاحات میں سے ایک قرار دیا۔ مرکزی وزیر محنت منسُکھ مانڈویّا نے پریس کانفرنس میں بتایا کہ تمام چار لیبر کوڈز اب باضابطہ طور پر نافذ ہو چکے ہیں اور یہی ملک کا نیا قانون ہیں۔

ان کے مطابق ان کوڈز سے روزگار کو منظم شکل ملے گی، مزدوروں کے تحفظ کی ضمانت بڑھے گی اور کام کا ماحول سادہ، محفوظ اور عالمی معیار کے مطابق ہو جائے گا۔ بنیادی انتظامی اصلاحات میں قومی کم از کم اجرت، جنس کے امتیاز کے بغیر کام کی یکساں پالیسی، انسپکٹر–کم–فیسلیٹیٹر ماڈل، دو رکنی ٹریبونل کے ذریعے تیز رفتاری سے تنازعات کا حل، اور قومی اوکیوپیشنل سیفٹی اینڈ ہیلتھ بورڈ کی تشکیل شامل ہیں۔

حکومت اب تفصیلی قواعد اور اسکیمیں بنانے کے لیے مشاورت شروع کرے گی۔ اس دوران جہاں ضروری ہوگا، پرانے مزدور قوانین کی دفعات بھی عارضی طور پر نافذ رہیں گی۔ سماجی تحفظ کا دائرہ 2015 میں 19 فیصد سے بڑھ کر 2025 میں 64 فیصد سے زیادہ ہو چکا ہے۔

وزارت نے اپنے بیان میں کہا کہ یہ قدم مزدوروں کی فلاح، قانون کی جدید کاری اور بدلتے عالمی حالات کے مطابق کام کے ماحول کو ہم آہنگ کرنے کے لیے اہم سنگِ میل ہے، جو مستقبل کے لیے تیار ورک فورس اور مضبوط صنعتوں کی بنیاد رکھے گا۔ وزارت نے بتایا کہ بھارت کے کئی مزدور قوانین آزادی سے پہلے یا آزادی کے ابتدائی دور (1930 سے 1950 کے درمیان) میں بنائے گئے تھے، جب معاشی اور کاروباری حالات بالکل مختلف تھے، جبکہ دنیا کی بڑی معیشتیں اپنے لیبر قوانین کو وقت کے ساتھ بہتر کرتی رہیں۔ لیکن بھارت میں 29 مرکزی قوانین کی صورت میں ایک بکھرا ہوا، پیچیدہ اور پرانا نظام رائج تھا۔

منسُکھ مانڈویّا نے ’ایکس‘ پر لکھا: "مودی حکومت کی گارنٹی: ہر مزدور کو عزت! آج سے ملک میں نئے لیبر کوڈز نافذ ہو چکے ہیں۔" انہوں نے کہا کہ یہ کوڈز ہر کارکن کو کم از کم اجرت کی ضمانت دیں گے، نوجوانوں کو تقرری نامہ ملے گا، خواتین کو مساوی اجرت اور تحفظ ملے گا، 40 کروڑ مزدوروں کو سماجی تحفظ حاصل ہوگا، ایک سال کام کرنے والے مقررہ مدت کے ملازمین کو گریجویٹی ملے گی، 40 سال سے زائد عمر والوں کو سالانہ مفت طبی جانچ فراہم ہوگی، اوور ٹائم پر دوگنی اجرت ملے گی، خطرناک صنعتوں میں 100 فیصد صحت کا تحفظ دیا جائے گا اور بین الاقوامی معیار کے مطابق مزدوروں کو سماجی انصاف ملے گا۔

ان کے مطابق یہ اصلاحات عام تبدیلیاں نہیں بلکہ مودی حکومت کا مزدوروں کی فلاح کے لیے ایک بڑا تاریخی قدم ہیں، جو آتم نربھَر بھارت اور سنہ 2047 تک وِکست بھارت کے ہدف کو تیز کرنے میں اہم کردار ادا کریں گے۔ سماجی تحفظ کوڈ 2020 کے تحت اب گِگ ورکرز سمیت تمام کارکنوں کو سماجی تحفظ حاصل ہوگا۔

ہر مزدور کو پی ایف، ای ایس آئی سی، بیمہ اور دیگر سماجی تحفظ کے فوائد ملیں گے۔ ویتن کوڈ 2019 کے مطابق تمام مزدوروں کو قانونی کم از کم اجرت ملے گی اور وقت پر ادائیگی سے ان کی مالی حفاظت یقینی ہوگی۔ ای ایس آئی سی کا دائرہ پورے ملک میں بڑھا دیا گیا ہے: 10 سے کم ملازمین والی یونٹس کے لیے یہ اختیاری ہوگا جبکہ خطرناک کاموں والی یونٹس میں لازمی رہے گا۔

مقررہ مدت کے ملازمین (FTE) کو اب مستقل ملازمین جیسے تمام فوائد ملیں گے جن میں چھٹی، طبی سہولت اور سماجی تحفظ شامل ہیں۔ ان کوڈز میں پہلی مرتبہ ’گِگ ورک‘، ’پلیٹ فارم ورک‘ (جیسے زومیٹو، سوئگی وغیرہ کے کارکن) اور ’ایگریگیٹر‘ جیسے الفاظ کو قانونی طور پر متعارف کرایا گیا ہے۔

شجر کاری کے کارکنوں کو بھی اوکیوپیشنل سیفٹی اینڈ ہیلتھ اور سماجی تحفظ کوڈ کے دائرے میں شامل کیا جائے گا۔ ڈیجیٹل اور آڈیو–ویژول کارکنوں کو بھی مکمل فوائد ملیں گے، جن میں الیکٹرانک میڈیا کے صحافی، ڈَبنگ آرٹسٹ اور اسٹنٹ فنکار شامل ہیں۔