نئی دہلی: ممنوعہ طلبہ تنظیم سیمی کے سابق سربراہ صفدر ناگوری نے سپریم کورٹ سے درخواست کی ہے کہ نچلی عدالت سے ملی عمر قید کی سزا کے خلاف ان کی اپیل کی ہائی کورٹ میں سماعت کی اجازت دی جائے۔ سپریم کورٹ نے اس معاملے میں نوٹس جاری کرتے ہوئے فریقین سے جواب طلب کیا ہے، اور دو ہفتے بعد سماعت مقرر کی گئی ہے۔

سماعت کے دوران جسٹس پی ایس نرسمہا کی بنچ کے سامنے درخواست گزار کی جانب سے سینئر وکیل شادان فراست نے کہا کہ سپریم کورٹ نے اپنے ایک فیصلے میں عبوری حکم جاری کرتے ہوئے ملک بھر میں غداری کے مقدمات پر روک لگا دی تھی، جس کی وجہ سے ان کی اپیل کی سماعت ممکن نہیں ہو پائی۔

درحقیقت، مدھیہ پردیش کی نچلی عدالت نے غداری کے مقدمے میں صفدر ناگوری کو عمر قید کی سزا سنائی تھی۔ اس فیصلے کو انہوں نے مدھیہ پردیش ہائی کورٹ میں چیلنج کیا، لیکن ہائی کورٹ نے اپیل کی سماعت سے انکار کر دیا۔

ہائی کورٹ کا کہنا تھا کہ سپریم کورٹ کی جانب سے ملک بھر میں غداری کے مقدمات پر جاری سماعت پر پابندی ہے، اس لیے وہ اس اپیل پر سماعت نہیں کر سکتا۔ قابل ذکر ہے کہ 2008 کے احمد آباد سیریل بم دھماکوں کے معاملے میں نچلی عدالت صفدر ناگوری کو پہلے ہی سزائے موت سنا چکی ہے۔