لکھنو: سابق وزیر گایتری پرساد پرجاپتی پر ہوئے حملے کے بعد ان کے اہل خانہ نے بدھ کے روز ان کی حفاظت بڑھانے کا مطالبہ کیا ہے۔ ساتھ ہی خاندان نے اس حملے کو ایک ’’سازش‘‘ کا حصہ قرار دیا ہے۔ پرجاپتی پر منگل کو لکھنؤ ضلعی جیل میں حملہ ہوا تھا، جس میں ان کے سر پر چوٹ آئی تھی۔ اسپتال سے نکلتے وقت پرجاپتی نے بتایا کہ ان پر ایک سزا یافتہ قیدی وشواس نے چاقو سے حملہ کیا۔

ان کی بیٹی انکیتا پرجاپتی نے کہا کہ ان کے والد گزشتہ آٹھ برسوں سے ایک ایسے جرم (اجتماعی عصمت دری) کے لیے جیل میں ہیں جو انہوں نے کیا ہی نہیں۔ ’’ملزمہ (خاتون) کا میڈیکل تک نہیں کرایا گیا اور والد کو عمر قید کی سزا سنا دی گئی۔ ہماری بات نہیں سنی گئی۔ ہم نے وزیر اعلیٰ سے ملاقات اور مدد کرنے کی درخواست کی ہے۔ میرے والد بے گناہ ہیں۔‘‘

انہوں نے الزام لگایا کہ ان کے والد کی جان کو خطرہ ہے اور جیل میں ان کی حفاظت بڑھائی جانی چاہیے۔ امیٹھی سے سماج وادی پارٹی کی رکن اسمبلی اور پرجاپتی کی اہلیہ مہاراجی پرجاپتی نے کہا کہ جیل میں جو کچھ ہوا وہ ایک سازش تھی۔ انہوں نے کہا، ’’جب سوئی بھی اندر نہیں جا سکتی، تو چاقو جیل میں کیسے پہنچ گیا؟ میں حکومت سے اپنے شوہر کے ساتھ انصاف کی مانگ کرتی ہوں۔‘‘

پولیس نے بتایا کہ اکھلیش یادو کی قیادت والی اتر پردیش حکومت میں وزیر رہے پرجاپتی پر ایک ساتھی قیدی نے حملہ کیا۔ ایک سرکاری بیان میں کہا گیا کہ جھگڑے کے دوران قیدی نے مبینہ طور پر پرجاپتی پر الماری کے ایک سلائیڈنگ حصے سے وار کیا، جس سے انہیں چوٹ لگی۔ پرجاپتی اب بالکل ٹھیک ہیں۔ وہ عصمت دری سمیت کئی معاملات میں عدالتی حراست میں ہیں۔

سماج وادی پارٹی کے صدر اکھلیش یادو نے ان پر ہوئے مبینہ حملے کی عدالتی جانچ کا مطالبہ کیا ہے۔ ایکس (سابقہ ٹوئٹر) پر اپنے بیان میں انہوں نے کہا، ’’سابق وزیر گایتری پرساد پرجاپتی پر جیل میں ہوئے جان لیوا حملے کی غیر جانبدار عدالتی جانچ ہونی چاہیے۔ اتر پردیش میں کہیں بھی کوئی محفوظ نہیں ہے۔‘‘

جیل میں لوہے کی رَڈ سے حملہ، سابق وزیر گایتری پرساد پرجاپتی زخمی لکھنؤ ضلعی جیل میں بند سابق وزیر گایتری پرساد پرجاپتی پر منگل کی شام ایک قیدی نے حملہ کر دیا۔ قیدی نے لوہے کی رَڈ سے ان کے سر پر وار کیے اور ان کا سر پھاڑ دیا۔ جیل کے ڈاکٹر نے ابتدائی علاج کرتے ہوئے چھ ٹانکے لگائے۔ موقع پر جیل سپرنٹنڈنٹ اور جیلر سمیت دیگر افسران بھی پہنچ گئے۔ چوٹ کو دیکھتے ہوئے سابق وزیر کو سخت سکیورٹی کے درمیان ٹراما سینٹر بھیجا گیا۔

اجتماعی عصمت دری کے معاملے میں عمر قید کی سزا کاٹ رہے پرجاپتی شوگر، بلڈ پریشر، گردہ، کمر درد اور دیگر بیماریوں میں مبتلا ہیں۔ اسی وجہ سے انہیں جیل اسپتال میں رکھا گیا ہے۔ جیل حکام کے مطابق، منگل کی شام تقریباً ساڑھے چھ بجے انہوں نے اسپتال میں صفائی کرنے والے قیدی وشواس کو پانی لانے کے لیے بلایا تھا۔

پانی لانے میں تاخیر ہونے پر پرجاپتی نے اس سے کچھ کہا، جس پر دونوں میں تکرار ہو گئی۔ ناراض قیدی نے میز کی دراز سے ایک چھوٹی لوہے کی رَڈ نکالی اور ان کے سر پر کئی وار کر دیے۔ سابق وزیر سر پکڑ کر بیٹھ گئے۔ ڈاکٹر نے مرہم پٹی کی اور انہیں کے جی ایم یو ٹراما سینٹر بھیج دیا۔ جیل اسپتال میں زیر علاج پرجاپتی کی ایک صفائی کرنے والے قیدی سے کہا سنی ہوئی تھی۔

اس پر ناراض ہو کر وشواس نامی قیدی نے ان کے سر پر رَڈ ماری تھی۔ سر میں معمولی چوٹ آئی ہے۔ کوئی خطرے کی بات نہیں ہے۔ احتیاط کے طور پر انہیں ٹراما سینٹر کے ڈاکٹروں کو بھی دکھایا گیا۔