نئی دہلی: وزیر دفاع راج ناتھ سنگھ نے جمعہ کے روز سابق سربراہِ فوج جنرل وشو ناتھ شرما کے انتقال پر گہرے رنج و غم کا اظہار کرتے ہوئے انہیں ایک عظیم فوجی رہنما قرار دیا، جنہوں نے بے مثال عزم، بہادری اور وقار کے ساتھ ملک کی خدمت کی۔

راج ناتھ سنگھ نے سوشل میڈیا پلیٹ فارم ایکس پر تعزیتی پیغام میں کہا، "سابق آرمی چیف جنرل وشو ناتھ شرما کے انتقال کی خبر انتہائی افسوسناک ہے۔ ایک بہترین فوجی رہنما کے طور پر انہوں نے غیر متزلزل عزم، شجاعت اور وقار کے ساتھ ملک کی خدمت کی۔ انہوں نے اپنے خاندان کی عظیم روایت کو بھی شاندار انداز میں آگے بڑھایا، جس میں ان کے بڑے بھائی، پہلے پرم ویر چکر یافتہ میجر سومناتھ شرما بھی شامل تھے۔"

انہوں نے مزید کہا، "ہندوستانی فوج کے لیے ان کی خدمات اور ان کی مثالی زندگی آنے والی نسلوں کو ہمیشہ متاثر کرتی رہے گی۔ میری ہمدردیاں ان کے اہل خانہ اور چاہنے والوں کے ساتھ ہیں۔ اوم شانتی!" ہندوستانی فوج نے بھی ایکس پر جاری اپنے پیغام میں سابق آرمی چیف کو خراجِ عقیدت پیش کیا۔

فوج نے کہا کہ آرمی چیف جنرل دھیرج سیٹھ اور ہندوستانی فوج کے تمام افسران اور جوان جنرل وشو ناتھ شرما (PVSM، AVSM، ADC) کے انتقال پر گہرے دکھ کا اظہار کرتے ہیں اور ان کے اہل خانہ سے دلی تعزیت کرتے ہیں۔ فوج نے جنرل شرما کو "ایک عظیم سپاہی اور دور اندیش فوجی رہنما" قرار دیتے ہوئے کہا کہ انہوں نے اپنی پوری زندگی ملک کی خدمت کے لیے وقف کر دی۔ بیان میں کہا گیا کہ آزاد ہندوستان کے پہلے پرم ویر چکر حاصل کرنے والے میجر سومناتھ شرما کے چھوٹے بھائی ہونے کے ناطے انہوں نے اپنے خاندان کی بہادری اور بے لوث خدمت کی شاندار روایت کو برقرار رکھا۔

ان کی مثالی قیادت، فرض شناسی اور فوجی خدمات ہمیشہ یاد رکھی جائیں گی اور آنے والی نسلوں کے لیے مشعلِ راہ رہیں گی۔ جنرل وشو ناتھ شرما (PVSM، AVSM، ADC) کا جمعہ کو 96 برس کی عمر میں انتقال ہوا۔ وہ 4 جون 1930 کو لندن میں پیدا ہوئے تھے۔

ابتدائی تعلیم نینی تال کے شیرووڈ کالج میں حاصل کرنے کے بعد انہوں نے دہرادون کے پرنس آف ویلز رائل انڈین ملٹری کالج میں داخلہ لیا۔ انہیں جون 1950 میں ہندوستانی فوج میں کمیشن ملا اور وہ پہلے پریزیڈنٹس کمیشنڈ افسر تھے جو بعد میں فوج کے سربراہ کے منصب تک پہنچے۔ انہوں نے 1988 سے 1990 تک ہندوستانی فوج کے سربراہ (چیف آف آرمی اسٹاف) کی حیثیت سے خدمات انجام دیں۔