ممبئی: ریزرو بینک آف انڈیا نے جمعہ کو بتایا کہ 26 دسمبر کو ختم ہونے والے ہفتے کے دوران بھارت کے زرِ مبادلہ کے ذخائر میں 3.29 ارب امریکی ڈالر کا اضافہ ہوا، جس کے بعد مجموعی ذخائر 696.61 ارب ڈالر تک پہنچ گئے۔ اس سے پہلے والے ہفتے میں مجموعی زرِ مبادلہ کے ذخائر میں 4.36 ارب ڈالر کا اضافہ ہوا تھا اور یہ 693.31 ارب ڈالر کی سطح پر پہنچ گئے تھے۔

مرکزی بینک کے اعداد و شمار کے مطابق، 26 دسمبر کو ختم ہونے والے ہفتے میں زرِ مبادلہ کے ذخائر کا سب سے بڑا حصہ سمجھی جانے والی غیر ملکی کرنسی اثاثے (Foreign Currency Assets) میں 18 کروڑ 40 لاکھ ڈالر کا اضافہ ہوا اور یہ بڑھ کر 559.61 ارب ڈالر ہو گئے۔ ڈالر میں ظاہر کی جانے والی یہ اثاثے زرِ مبادلہ کے ذخائر کا ایک اہم جزو ہیں، جن میں یورو، پاؤنڈ اور ین جیسی غیر امریکی کرنسیوں کی قدر میں اتار چڑھاؤ کا اثر بھی شامل ہوتا ہے۔

ریزرو بینک نے بتایا کہ اس دوران سونے کے ذخائر کی مالیت میں 2.95 ارب ڈالر کا اضافہ ہوا اور یہ بڑھ کر 113.32 ارب ڈالر تک پہنچ گئے۔ اسی طرح خصوصی ڈرائنگ رائٹس (SDR) میں 6 کروڑ ڈالر کا اضافہ ہوا، جس کے بعد ان کی مالیت 18.80 ارب ڈالر ہو گئی۔ ریزرو بینک کے مطابق، بین الاقوامی مالیاتی فنڈ (آئی ایم ایف) کے پاس بھارت کے محفوظ ذخائر بھی زیرِ نظر ہفتے کے دوران 9 کروڑ 30 لاکھ ڈالر بڑھ کر 4.87 ارب ڈالر تک پہنچ گئے۔