نئی دہلی: وزیرِ اعظم نریندر مودی نے جمعہ کو طلبہ کو اپنے ذاتی اور تعلیمی ہنر کو نکھارنے پر توجہ مرکوز کرنے کا مشورہ دیتے ہوئے کہا کہ ملک میں ڈیٹا سستا ہونے کا مطلب یہ نہیں کہ وہ انٹرنیٹ پر وقت ضائع کریں۔ وزیرِ اعظم مودی نے ‘پریکھشا پہ چرچا 2026’ کے نویں ایڈیشن میں طلبہ سے کہا کہ تعلیم بوجھ نہیں ہونی چاہیے اور سب کو پوری لگن کے ساتھ پڑھائی کرنی چاہیے، کیونکہ آدھے دل سے کی گئی پڑھائی زندگی کو کامیاب نہیں بناتی۔

انہوں نے یہاں اپنی رہائش گاہ پر ملک کے مختلف حصوں سے آئے ہوئے طلبہ کے ایک گروپ سے کہا، ہمارا ہدف ایسا ہونا چاہیے جو ہماری پہنچ کے اندر ہو، لیکن آسانی سے حاصل ہونے والا نہ ہو۔ پہلے اپنے ذہن کو قابو میں لاؤ، پھر اسے یکسو کرو اور اس کے بعد جن مضامین کی پڑھائی کرنی ہے، انہیں سامنے رکھو۔ تب آپ ہمیشہ طالب علم کو کامیاب پائیں گے۔

مودی نے طلبہ کو تفریح کے نام پر گیم کھیلنے میں وقت ضائع نہ کرنے کا مشورہ دیا۔ انہوں نے کہا، آپ کی گیمنگ میں دلچسپی ہو سکتی ہے، لیکن چونکہ بھارت میں ڈیٹا سستا ہے، اس لیے صرف وقت گزارنے کے لیے اس میں ملوث نہ ہوں۔ اسے محض تفریح کے لیے نہ کریں۔ جو لوگ پیسے کمانے کے لیے گیمنگ میں پڑتے ہیں، انہیں ہی نقصان ہوتا ہے۔ ہمیں ملک میں جوئے کو فروغ نہیں دینا ہے۔ میں نے آن لائن جوئے کے خلاف قانون بنایا ہے۔

وزیرِ اعظم نے کہا کہ گیمنگ ایک ہنر ہے کیونکہ اس میں تیزی ہوتی ہے، اور اسے چوکسی پرکھنے اور خود کی نشوونما کے لیے استعمال کیا جا سکتا ہے۔ وزیرِ اعظم نے اس بات پر زور دیا کہ ہر شخص کا کام کرنے کا اپنا ایک طریقہ یا انداز ہوتا ہے۔

انہوں نے کہا،میں وزیرِ اعظم بن گیا ہوں، اس کے باوجود لوگ مجھے مشورہ دیتے ہیں کہ مختلف طریقے سے کام کرو، لیکن ہر کسی کی اپنی کام کرنے کی طرز ہوتی ہے۔ کچھ لوگ صبح کے وقت بہتر پڑھتے ہیں، کچھ رات میں۔ جو بھی آپ کو درست لگے، اس پر یقین کریں، لیکن مشورہ بھی لیں، اور اگر اس سے آپ کو فائدہ ہو تو ہی اسے اپنی زندگی کا حصہ بنائیں۔