نئی دہلی: آسام میں سیلاب کی صورتحال میں بہتری آئی ہے اور کئی اضلاع میں پانی کی سطح کم ہو رہی ہے۔ ریاست میں گزشتہ 24 گھنٹوں کے دوران سیلاب سے کسی نئی ہلاکت کی اطلاع نہیں ملی، جبکہ متاثرہ افراد کی تعداد کم ہو کر 4.45 لاکھ رہ گئی ہے۔ حکام نے منگل کو یہ معلومات دی۔

حکام کے مطابق، مرکزی حکومت کے ایک وفد نے سیلاب سے سب سے زیادہ متاثرہ اضلاع میں شامل شیوساگر کا دورہ کیا اور ریاست کے مشرقی علاقوں میں سیلاب کی صورتحال کا جائزہ لیا۔ سرکاری بلیٹن کے مطابق، اب تک سیلاب سے 68 افراد جان گنوا چکے ہیں۔

گزشتہ 24 گھنٹوں کے دوران نہ کوئی نئی ہلاکت ہوئی اور نہ ہی کسی کے لاپتا ہونے کی اطلاع ملی۔ حکام نے بتایا کہ شیوساگر، گولاگھاٹ، چرائیدیو، جورہاٹ، ناگاؤں اور کامروپ (میٹروپولیٹن) اضلاع اب بھی سیلاب سے متاثر ہیں، تاہم مجموعی طور پر متاثرہ افراد کی تعداد گھٹ کر 4.45 لاکھ رہ گئی ہے۔

چرائیدیو سب سے زیادہ متاثرہ ضلع ہے، جہاں اب بھی 1.88 لاکھ افراد سیلاب سے متاثر ہیں۔ اس کے بعد شیوساگر میں 1.44 لاکھ اور جورہاٹ میں 74,458 افراد متاثر ہیں۔ واضح رہے کہ اتوار تک پانچ اضلاع میں سیلاب سے متاثرہ افراد کی تعداد 5.24 لاکھ سے زیادہ تھی، جس میں اب نمایاں کمی آئی ہے۔