ممبئی: مہاراشٹر کے وزیر اعلیٰ دیویندر فڑنویس نے پیر کے روز کولہاپور اور سانگلی اضلاع میں بار بار آنے والے سیلاب سے نمٹنے کے لیے 3,200 کروڑ روپے کے فلڈ مینجمنٹ مشن کا اعلان کیا۔ یہ منصوبہ مہاراشٹر ریزیلینس ڈیولپمنٹ پروگرام (MRDP) کے تحت نافذ کیا جائے گا، جس کا مقصد بارش کے پانی کو ذخیرہ کرنے کی صلاحیت میں اضافہ، دریائے کرشنا اور پنچ گنگا کی پانی برداری کی گنجائش بڑھانا اور نکاسیٔ آب کے نظام کو مضبوط بنانا ہے۔

وزیر اعلیٰ فڑنویس نے سوشل میڈیا پلیٹ فارم ایکس پر کہا کہ ریاستی حکومت اور ورلڈ بینک نے مشترکہ طور پر ایم آر ڈی پی کے تحت اس منصوبے کی تیاری اور ضروری کارروائیاں مکمل کر لی ہیں۔ انہوں نے کہا کہ 3,200 کروڑ روپے کا یہ مشن کولہاپور، سانگلی اور اچلکرنجی کو طویل مدتی بنیادوں پر سیلاب سے محفوظ بنانے کی جانب ایک اہم قدم ہے۔ اس کے تحت بارش کے پانی کا ذخیرہ بڑھایا جائے گا، دریائے کرشنا اور پنچ گنگا کی پانی برداری کی صلاحیت میں اضافہ کیا جائے گا اور طوفانی پانی کی نکاسی کے نظام کو مزید مؤثر بنایا جائے گا۔

فڑنویس نے اس منصوبے کے لیے وزیر اعظم نریندر مودی، مرکزی وزیر خزانہ نرملا سیتا رمن، حکومتِ ہند کے محکمۂ اقتصادی امور اور ورلڈ بینک کا شکریہ ادا کرتے ہوئے کہا کہ وہ اس منصوبے پر تیز رفتاری سے عمل درآمد کے منتظر ہیں۔ واضح رہے کہ سانگلی اور کولہاپور اضلاع میں مانسون کے دوران دریائے کرشنا میں طغیانی آنے کے باعث ہر سال شدید سیلاب کی صورتحال پیدا ہو جاتی ہے۔