لیہہ / آواز دی وائس
مرکزی زیر انتظام خطہ لداخ کے بالائی علاقوں میں موسم کی پہلی برفباری ہوئی جبکہ نشیبی علاقوں میں درمیانی درجے کی بارش ریکارڈ کی گئی۔ حکام نے منگل کو یہ اطلاع دی۔
ان کے مطابق 18,379 فٹ کی بلندی پر واقع خاردونگ لا درہ برفباری سے ڈھک گیا ہے۔
حکام نے بتایا کہ گزشتہ 24 گھنٹوں میں زیادہ تر پہاڑی دروں پر ہلکی سے درمیانی درجے کی برفباری ہوئی ہے۔ ان میں خاردونگ لا ٹاپ، لےہ-پینگونگ جھیل روٹ پر واقع 17,950 فٹ بلند چانگ لا ٹاپ اور زنسکار وادی کے علاقے شامل ہیں۔
انہوں نے بتایا کہ لیہہ اور کرگل ضلعی ہیڈکوارٹرز کے ساتھ دیگر سب ڈویژنوں میں بھی بارش ہوئی ہے، تاہم کسی بھی طرح کے نقصان کی اطلاع نہیں ملی۔ محکمہ موسمیات نے لداخ کے لیے ’’ریڈ الرٹ‘‘ جاری کیا ہے، جس میں کئی مقامات پر موسلادھار بارش، منگل کو ہلکی سے درمیانی بارش اور کچھ جگہوں پر بھاری بارش کے امکانات ظاہر کیے گئے ہیں۔ اس نے مزید بتایا کہ 27 سے 30 اگست تک لداخ میں خشک موسم رہنے کا امکان ہے۔
حکام نے پرانے کچے مکانات کو ممکنہ نقصان، پانی کے رساؤ، پہاڑی دروں پر ٹریفک میں رکاوٹ، بلندی والے علاقوں میں برفباری اور لینڈ سلائیڈنگ کے خطرے کے حوالے سے لوگوں کو متنبہ کیا ہے۔ ساتھ ہی عوام کو محتاط رہنے اور سرکاری ہدایات پر عمل کرنے کا مشورہ دیا گیا ہے۔
اسی دوران، حکام نے بتایا کہ خراب موسم کی وجہ سے لےہ ایئرپورٹ سے آنے جانے والی کئی پروازیں منسوخ کر دی گئی ہیں۔ نتیجتاً تبتی روحانی رہنما دلائی لاما کچھ اور دنوں تک لےہ میں ہی قیام کریں گے۔
