لکھنو: وزیر دفاع راجناتھ سنگھ اور اتر پردیش کے وزیراعلیٰ یوگی آدتیہ ناتھ نے ہفتہ کے روز لکھنؤ میں قائم براہموس ایرو اسپیس یونٹ سے تیار کی گئی براہموس میزائلوں کی پہلی کھیپ کو ہری جھنڈی دکھا کر روانہ کیا۔ یہ دن نہ صرف اتر پردیش ڈیفنس انڈسٹریل کاریڈور (یوپی ڈی آئی سی) کے لیے ایک سنگ میل ثابت ہوگا، بلکہ بھارت کے دفاعی مصنوعات میں خود انحصاری کے عزم کو بھی نئی توانائی دے گا۔

دنیا کی سب سے تیز رفتار اور مہلک درست نشانہ لگانے والی براہموس سپر سونک میزائل سسٹم بنانے والی کمپنی "براہموس ایرو اسپیس" نے لکھنؤ کی نئی انٹیگریشن اور ٹیسٹ سہولت سے میزائل کی پہلی کھیپ تیار کر لی ہے۔ یہ جدید یونٹ 11 مئی کو افتتاح کے بعد مکمل طور پر فعال ہو چکی ہے۔

اسی موقع پر وزیر دفاع راجناتھ سنگھ نے کہا کہ "آج کا دن اتر پردیش کے عوام کے لیے ایک اہم دن ہے۔ لکھنؤ دفاعی شعبے میں ایک اہم کردار ادا کر رہا ہے۔ میں نے پانچ ماہ قبل براہموس یونٹ کا افتتاح کیا تھا، اور آج اس کی پہلی کھیپ روانہ کر دی گئی۔ یہ کوئی معمولی بات نہیں ہے۔ آپریشن سندور نے ثابت کر دیا ہے کہ فتح اب ہماری پہچان بن چکی ہے۔ دنیا نے بھارت کی طاقت کو تسلیم کیا ہے۔

ملک کو اب یقین ہے کہ ہم بہت مضبوط ہو چکے ہیں۔ میں یہ بھی بتا دوں کہ جب بھارت پاکستان کو جنم دے سکتا ہے، تو آگے آپ خود سمجھدار ہیں۔ ہر زمین اب ہمارے ریڈار پر ہے۔ تقریب کے دوران وزیر دفاع اور وزیراعلیٰ نے بوسٹر ڈاکنگ عمل کو بھی دیکھا۔ اسی سلسلے میں براہموس سیمولیٹر آلات کی پیشکش بھی کی گئی۔ اس کے علاوہ دونوں نے پودا لگانے کی تقریب میں بھی شرکت کی۔

تقریب کے دوران، براہموس کے ڈائریکٹر جنرل ڈاکٹر جیتیرتھ آر جوشی نے وزیراعلیٰ یوگی آدتیہ ناتھ کو ایک چیک اور جی ایس ٹی بل پیش کیا، جس سے ریاستی حکومت کو آمدنی حاصل ہوگی۔ براہموس میزائلوں کی پیداوار سے اتر پردیش میں ہنر مند نوجوانوں کے لیے روزگار کے مواقع پیدا ہوں گے۔

لکھنؤ میں واقع براہموس یونٹ یوپی ڈیفنس کاریڈور کا پہلا ایسا ادارہ ہے، جہاں میزائل سسٹم کی تیاری سے لے کر حتمی جانچ تک کا پورا عمل ملک میں ہی انجام دیا جاتا ہے۔ یہ منصوبہ نہ صرف تزویراتی لحاظ سے اہم ہے بلکہ ریاست میں روزگار، سرمایہ کاری اور تکنیکی جدت کے نئے مواقع بھی پیدا کر رہا ہے۔