نئی دہلی: پولیٹیکل کنسلٹنسی فرم I-PAC کے دفتر اور اس کے شریک بانی پرتیک جین کی رہائش گاہ پر چھاپے کے معاملے میں دائر انفورسمنٹ ڈائریکٹوریٹ (ای ڈی) کی عرضی پر مغربی بنگال حکومت نے سوالات اٹھائے ہیں۔ عرضی میں دعویٰ کیا گیا ہے کہ چھاپے کے دوران مغربی بنگال کی وزیر اعلیٰ ممتا بنرجی اعلیٰ پولیس افسران کے ساتھ وہاں پہنچیں اور کارروائی میں رکاوٹ ڈالی اور شواہد کو نقصان پہنچایا۔

عرضی میں مطالبہ کیا گیا ہے کہ چھاپے میں رکاوٹ ڈالنے اور ثبوت مٹانے کے الزام میں ممتا بنرجی اور سینئر پولیس افسران کے خلاف ایف آئی آر درج کی جائے اور سی بی آئی سے جانچ کرائی جائے۔ بدھ (18 مارچ 2026) کو مغربی بنگال حکومت کے وکیل شیام دیوان نے کہا کہ ای ڈی آئین کے آرٹیکل 32 کے تحت عرضی دائر نہیں کر سکتی، کیونکہ یہ آرٹیکل بنیادی حقوق کے تحفظ کے لیے ہے اور ای ڈی کوئی فرد نہیں ہے، اس لیے اس کے بنیادی حقوق نہیں ہو سکتے۔

شیام دیوان نے کہا کہ آیا ای ڈی آرٹیکل 32 کے تحت عرضی دائر کر سکتی ہے، یہ ایک آئینی سوال ہے۔ انہوں نے مزید کہا کہ آرٹیکل 145 کے تحت ایسے معاملات کی سماعت کم از کم پانچ ججوں کی بنچ کے ذریعے ہونی چاہیے۔ اس پر ای ڈی کی جانب سے سالیسٹر جنرل تشار مہتا نے کہا کہ مغربی بنگال حکومت خود آرٹیکل 32 کے تحت رٹ پٹیشن دائر کر چکی ہے اور کیرالا حکومت نے بھی ایسا کیا ہے، اور ان مقدمات میں عرضی ریاست کے طور پر دائر کی گئی تھی۔