نئی دہلی: کانگریس نے امتحانی پرچہ لیک کے مقدمات کے لیے فاسٹ ٹریک عدالتیں قائم کرنے کے وزیر اعظم نریندر مودی کے اعلان کو ’’بہت کم اور بہت دیر سے اٹھایا گیا قدم‘‘ قرار دیتے ہوئے کہا ہے کہ طلبہ ایسے ’’ادھورے اقدامات‘‘ قبول نہیں کر سکتے۔

کانگریس کے جنرل سیکریٹری جے رام رمیش نے کہا کہ طلبہ صرف پرچہ لیک میں ملوث افراد کو سزا دینے کے بجائے مودی حکومت کی ناکامی، ایسے واقعات کو تسلیم نہ کرنے اور ان کی غیر جانبدارانہ تحقیقات نہ کرانے پر حقیقی جوابدہی چاہتے ہیں۔

انہوں نے ایکس پر جاری بیان میں کہا کہ طلبہ کے مطالبات بالکل واضح ہیں: مرکزی وزیر تعلیم دھرمیندر پردھان کو برطرف کیا جائے۔ طلبہ سے سرکاری طور پر معافی مانگی جائے۔ طلبہ پر مبینہ حملہ کرنے والوں کے خلاف کارروائی کی جائے۔ جے رام رمیش نے کہا کہ پرچہ لیک میں ملوث افراد کو سزا دینے کے لیے فاسٹ ٹریک عدالتوں کے قیام کا اعلان نہ صرف بہت دیر سے کیا گیا بلکہ یہ گمراہ کن بھی ہے۔

انہوں نے الزام لگایا کہ وزیر اعظم کو پہلے یہ تسلیم کرنا چاہیے کہ گزشتہ 12 برسوں کے دوران ان کی حکومت نے امتحانی پرچہ لیک کے واقعات کو کیسے چھپایا اور انہیں ہونے دیا۔ کانگریس رہنما نے وزیر اعظم نریندر مودی اور وزیر تعلیم دھرمیندر پردھان پر الزام عائد کیا کہ انہوں نے حقیقت تسلیم کرنے کے بجائے عوام اور پارلیمنٹ کو گمراہ کیا۔

انہوں نے کہا کہ وزارت تعلیم نے پارلیمنٹ کی قائمہ کمیٹی کے سامنے دعویٰ کیا تھا کہ نیشنل ٹیسٹنگ ایجنسی (این ٹی اے) کے زیر انتظام کسی بھی امتحان کا پرچہ لیک نہیں ہوا، جبکہ حقیقت اس کے برعکس تھی۔ جے رام رمیش نے مزید کہا کہ حکومت نے این ٹی اے کے امتحانات سے متعلق مبینہ پرچہ لیک کی تحقیقات کو بھی غیر واضح رکھا۔

انہوں نے مثال دیتے ہوئے کہا کہ 2024 کے نیٹ-یو جی پرچہ لیک کیس کے ملزمان کے خلاف کارروائی کی موجودہ صورتحال کے بارے میں کوئی شفافیت نہیں ہے۔ ان کے مطابق، صرف اتنا معلوم ہے کہ مرکزی تفتیشی بیورو (سی بی آئی) مرکزی ملزم سنجیو مکھیا کے خلاف وقت پر چارج شیٹ پیش نہ کر سکا، جس کے نتیجے میں اسے ضمانت مل گئی۔

انہوں نے یہ بھی کہا کہ سی بی آئی نے 2024 کے یو جی سی-نیٹ امتحان سے متعلق اپنی رپورٹ میں بے ضابطگی سے انکار کیا، حالانکہ اس وقت نیشنل ٹیسٹنگ ایجنسی نے یہی امتحان منسوخ کر دیا تھا۔ جے رام رمیش نے یاد دلایا کہ پارلیمنٹ نے 2024 کے آغاز میں عوامی امتحانات میں ناجائز ذرائع کی روک تھام سے متعلق قانون منظور کیا تھا، لیکن کانگریس اور دیگر اپوزیشن جماعتوں نے اس وقت بھی کہا تھا کہ یہ قانون پرچہ لیک روکنے کے لیے کافی نہیں ہے۔ انہوں نے کہا کہ وزیر اعظم نے اس وقت اپوزیشن کی تجاویز کو نظر انداز کیا، جبکہ آج بھی طلبہ ادھورے اقدامات قبول کرنے کے لیے تیار نہیں ہیں۔