نئی دہلی: مرکزی وزیر داخلہ امیت شاہ نے منگل کو یونیفائیڈ پیمنٹس انٹرفیس (یو پی آئی) کو تیز رفتار اور محفوظ ذریعہ قرار دیتے ہوئے کہا کہ یہ وزیر اعظم نریندر مودی کے جدت طرازی کے ذریعے ہندوستان کو تبدیلی کی راہ پر آگے لے جانے کے وژن کی ایک مثال ہے۔ یو پی آئی کے استعمال کے آغاز کو منگل کے روز 10 سال مکمل ہوگئے۔

شاہ نے ’ایکس‘ پر ایک پیغام میں کہا، "یو پی آئی جدت طرازی کے ذریعے ہندوستان کو تبدیلی کی راہ پر آگے لے جانے کے وزیر اعظم نریندر مودی کے وژن کی ایک مثال ہے۔" انہوں نے کہا، "یو پی آئی کے 10 برسوں میں ہمارے ملک نے دنیا کا سب سے بڑا حقیقی وقت ادائیگی کا نظام قائم کیا ہے اور یہ ثابت کیا ہے کہ ڈیجیٹل انڈیا کے ذریعے لوگوں کو تیز، آسان اور محفوظ ذریعہ فراہم کرکے ہم کیا کچھ حاصل کرسکتے ہیں۔

" ریزرو بینک آف انڈیا کی نگرانی میں نیشنل پیمنٹس کارپوریشن آف انڈیا نے بنیادی طور پر موبائل فون کے ذریعے نقد رقم کے بغیر ادائیگی کے طریقے کے طور پر 25 اگست 2016 کو یو پی آئی کا آغاز کیا تھا۔ آغاز کے بعد سے یو پی آئی کے ذریعے ہونے والے لین دین کی تعداد میں 13,000 گنا اضافہ ہوا ہے۔ مالی سال 2025-26 میں یو پی آئی کے ذریعے 314 لاکھ کروڑ روپے کے لین دین ہوئے۔

حکومت کی جانب سے جاری بیان میں کہا گیا ہے، "سالانہ لین دین کی تعداد مالی سال 2016-17 میں صرف 1.78 کروڑ تھی، جو مالی سال 2025-26 میں بڑھ کر 24,162 کروڑ سے زیادہ ہوگئی۔ اس طرح لین دین کی تعداد میں تقریباً 13,000 گنا اضافہ ہوا ہے۔" بیان کے مطابق، "اسی طرح لین دین کی مجموعی رقم مالی سال 2016-17 میں 0.07 لاکھ کروڑ روپے تھی، جو مالی سال 2025-26 میں بڑھ کر تقریباً 314 لاکھ کروڑ روپے ہوگئی۔ یعنی لین دین کی رقم میں 4,000 گنا سے زیادہ اضافہ ہوا ہے۔"