نئی دہلی/ آواز دی وائس
گجرات کے سابق وزیر اعلیٰ وجے روپانی بھی ان مسافروں میں شامل تھے جو جمعرات کو احمد آباد سے لندن جانے والی ایئر انڈیا کی تباہ ہونے والی پرواز میں سوار تھے۔ روپانی پہلے شخص نہیں ہیں جنہوں نے ہوائی حادثے میں جان گنوائی ہو۔ کئی معروف شخصیات ہوائی حادثات کا شکار ہو چکی ہیں۔
جمعرات کو احمد آباد کے سردار ولبھ بھائی پٹیل بین الاقوامی ہوائی اڈے سے لندن کے گیٹوک ہوائی اڈے کے لیے اُڑان بھرنے کے کچھ ہی منٹ بعد ایئر انڈیا کا ڈریم لائنر بوئنگ 787 طیارہ حادثے کا شکار ہو گیا۔ اس طیارے میں سوار 242 میں سے 241 افراد ہلاک ہو گئے۔
ہوائی حادثات میں جان گنوانے والی چند شخصیات
ہومی جہانگیر بھابھا (1966): ہندوستان کے معروف نیوکلیئر سائنسدان ڈاکٹر ہومی جہانگیر بھابھا کی موت 24 جنوری 1966 کو ایئر انڈیا کی پرواز 101 کے حادثے میں ہوئی۔ جنیوا ہوائی ٹریفک کنٹرول سے غلط مواصلات کے باعث جہاز سوئس الپس پہاڑوں سے ٹکرا گیا۔
سنجے گاندھی (1980): کانگریس لیڈر اور اُس وقت کی وزیر اعظم اندرا گاندھی کے بیٹے سنجے گاندھی کی 23 جون 1980 کو ایک ہوائی حادثے میں موت ہوئی۔ وہ دہلی کے صفدرجنگ ایئرپورٹ کے قریب دہلی فلائنگ کلب کے طیارے کو اڑا رہے تھے، جہاں کرتب دکھانے کی کوشش کے دوران طیارے پر سے کنٹرول کھو بیٹھے اور حادثہ پیش آیا۔
مادھو راؤ سندھیا (2001): کانگریس کے سینئر لیڈر مادھوراو سندھیا 30 ستمبر 2001 کو ایک طیارہ حادثے میں جانبحق ہو گئے۔ وہ کانپور جا رہے تھے کہ ان کا دس نشستوں والا نجی طیارہ اتر پردیش کے مین پوری کے نزدیک خراب موسم کے باعث گر کر تباہ ہو گیا۔
جی ایم سی بالیوگی (2002): لوک سبھا اسپیکر اور تیلگو دیشم پارٹی کے رہنما جی ایم سی بالیوگی کی موت 3 مارچ 2002 کو ایک ہیلی کاپٹر حادثے میں ہوئی۔ یہ حادثہ آندھرا پردیش کے کرشنا ضلع میں کائیکالور کے قریب پیش آیا جب ان کا ہیلی کاپٹر ایک تالاب میں گر کر تباہ ہو گیا۔
سائپریئن سنگما (2004): میگھالیہ کے دیہی ترقی کے وزیر سائپریئن سنگما اور نو دیگر افراد 22 ستمبر 2004 کو گواہاٹی سے شیلانگ جاتے ہوئے ہیلی کاپٹر حادثے میں ہلاک ہو گئے۔ یہ حادثہ شیلانگ سے صرف 20 کلومیٹر دور باراپانی جھیل کے قریب پیش آیا۔
کے ایس سومیّا عرف سوندریا (2004): جنوبی ہند کی معروف اداکارہ سوندریا عرف کے ایس سومیّا کی موت 17 اپریل 2004 کو ایک فضائی حادثے میں ہوئی۔ وہ اپنے بھائی کے ساتھ بنگلور سے کریم نگر جا رہی تھیں جب ان کا طیارہ گر کر تباہ ہو گیا۔
او پی جندل اور سورندر سنگھ (2005): صنعت کار اور ہریانہ کے وزیر اوم پرکاش جندل اور زراعت کے وزیر سورندر سنگھ کی موت 2005 میں ایک ہیلی کاپٹر حادثے میں ہوئی۔ ان کا ہیلی کاپٹر دہلی سے چندی گڑھ جا رہا تھا اور سہارنپور، اتر پردیش میں حادثے کا شکار ہو گیا۔
وائی ایس راج شیکھر ریڈی (2009): آندھرا پردیش کے اُس وقت کے وزیر اعلیٰ وائی ایس راج شیکھر ریڈی کی موت 2 ستمبر 2009 کو ایک ہیلی کاپٹر حادثے میں ہوئی۔ خراب موسم کے باعث ان کا بیل 430 ہیلی کاپٹر نلہ مالا جنگل میں گر کر تباہ ہو گیا۔
دورجی کھانڈو (2011): اروناچل پردیش کے اُس وقت کے وزیر اعلیٰ دورجی کھانڈو اور چار دیگر افراد 30 اپریل 2011 کو اس وقت مارے گئے جب ان کا ہیلی کاپٹر توانگ سے ایتانگر آتے ہوئے ریاست کے مغربی کامینگ ضلع میں گر کر تباہ ہو گیا۔
جنرل بپن راوت (2021): ہندوستان کے پہلے چیف آف ڈیفنس اسٹاف جنرل بپن راوت کی موت 8 دسمبر 2021 کو ایک ہیلی کاپٹر حادثے میں ہوئی۔ یہ حادثہ تمل ناڈو کے کنور کے قریب اس وقت پیش آیا جب وہ اپنی بیوی اور 11 دیگر افراد کے ساتھ سُلور سے ویلنگٹن جا رہے تھے۔
