نئی دہلی: دہلی کی ایک عدالت میں ایک عدالتی اہلکار (اہلمد) نے دعویٰ کیا ہے کہ انسدادِ بدعنوانی شاخ نے ایک جج کے خلاف انتقامی کارروائی کے طور پر رشوت ستانی کا جھوٹا مقدمہ درج کیا ہے تاکہ انہیں پھنسا کر بدلہ لیا جا سکے۔ اہلمد نے عدالت میں دائر اپنی قبل از گرفتاری ضمانت کی درخواست میں مؤقف اختیار کیا کہ انہوں نے کوئی غلط کام نہیں کیا اور انہیں جان بوجھ کر جھوٹے مقدمے میں پھنسایا گیا ہے۔
انہوں نے کہا کہ خصوصی جج دیپالی شرما کی عدالت میں ان کی تعیناتی 14 ستمبر 2023 سے 21 مارچ 2025 کے دوران رہی تھی۔ دورانِ تعیناتی زیادہ تر مقدمات میں اے سی بی ہی شکایت کنندہ تھی۔ اہلمد کے مطابق، دورانِ ملازمت اے سی بی اور دہلی حکومت کے کچھ افسران نے انہیں سنگین نتائج کی دھمکیاں دیں، جس کے بعد انہوں نے 25 جنوری 2025 کو اپنا تبادلہ کرانے کی درخواست دی تھی۔۔
۔ 16 مئی کو، عدالت کے جج نے اے سی بی کے جوائنٹ کمشنر کو اظہارِ وجوہ کا نوٹس جاری کیا کہ کیوں نہ ان کے خلاف دہلی ہائی کورٹ میں توہینِ عدالت کی کارروائی کی جائے، کیونکہ انہوں نے عدالتی اہلکاروں کو مبینہ طور پر دھمکایا تھا۔ اہلمد نے الزام لگایا کہ اس کے بعد اے سی بی اور دہلی حکومت کے حکام نے جج سے انتقام لینے کی نیت سے ان کے خلاف من گھڑت اور جھوٹی ایف آئی آر درج کی تاکہ جج کو بھی بدنام کیا جا سکے۔
۔ 22 مئی کو خصوصی جج دیپالی شرما نے سرکاری وکیل کے دلائل سننے کے بعد اہلمد کی ضمانت کی عرضی خارج کر دی۔ سرکاری وکیل نے مؤقف اختیار کیا کہ سازش کی مکمل حقیقت جاننے کے لیے ملزم سے حراست میں پوچھ گچھ ضروری ہے۔ تاہم عدالت نے اے سی بی کو یہ ہدایت ضرور دی کہ اگر گرفتاری کرنی ہو تو قانون کے مطابق کارروائی کی جائے۔ اہلمد نے دہلی ہائی کورٹ میں ایک رِٹ پٹیشن بھی دائر کی ہے جس میں معاملے کی آزادانہ جانچ کا مطالبہ کیا گیا ہے۔
ہائی کورٹ نے دہلی حکومت کو اس معاملے میں اسٹیٹس رپورٹ جمع کرانے کی ہدایت دی ہے اور کیس کی سماعت 29 مئی کو مقرر کی ہے۔ اس سے قبل 14 فروری کو دہلی ہائی کورٹ نے اے سی بی کی اس درخواست کو مسترد کر دیا تھا جس میں خصوصی جج کے خلاف براہ راست تحقیقات کی اجازت مانگی گئی تھی، کیونکہ عدالت نے کہا کہ جج کے خلاف خاطر خواہ ثبوت موجود نہیں ہیں۔ تاہم، ہائی کورٹ نے اے سی بی کو اجازت دی تھی کہ وہ عمومی تفتیش جاری رکھ سکتی ہے، اور اگر مستقبل میں کوئی ٹھوس ثبوت ملے تو دوبارہ عدالت سے رجوع کر سکتی ہے۔ اے سی بی نے 16 مئی کو اہلمد کے خلاف ایف آئی آر درج کی تھی۔
