نئی دہلی: سپریم کورٹ نے پیر، 18 مئی کو 2020 دہلی فسادات سازش کیس میں طالب علم کارکنان عمر خالد اور شرجیل امام کو ضمانت نہ دینے والے فیصلے گلفشاں فاطمہ بنام ریاست پر سنجیدہ تحفظات کا اظہار کیا۔ عدالت عظمیٰ نے کہا کہ حتیٰ کہ غیر قانونی سرگرمیاں (روک تھام) ایکٹ (UAPA) جیسے معاملات میں بھی “ضمانت اصول ہونی چاہیے اور جیل استثنا”۔

عدالت نے یہ مشاہدہ ایک کشمیری شہری سید افتخار اندرابی کو ضمانت دیتے ہوئے کیا، جو جون 2020 سے بغیر مقدمہ چلے جیل میں قید تھے۔ انہیں نیشنل انویسٹی گیشن ایجنسی (NIA) نے مبینہ نارکو ٹیررزم کیس میں گرفتار کیا تھا۔ جسٹس بی وی ناگارتھنا اور جسٹس اجّل بھویاں پر مشتمل بنچ نے کہا کہ گلفشاں فاطمہ بنام ریاست کیس میں دو رکنی بنچ (جسٹس اروند کمار اور جسٹس این وی انجاریا) نے 2021 کے یونین آف انڈیا بنام کے اے نجیب فیصلے کی صحیح پیروی نہیں کی، جس میں سپریم کورٹ کی تین رکنی بنچ نے قرار دیا تھا کہ مقدمے میں غیر معمولی تاخیر UAPA کیسز میں بھی ضمانت کی بنیاد بن سکتی ہے۔

اس کیس میں گلفشاں فاطمہ، میرا حیدر، شفا الرحمن، محمد سلیم خان اور شہاب احمد کو ضمانت دی گئی تھی، جبکہ عمر خالد اور شرجیل امام کی ضمانت مسترد کر دی گئی تھی۔ بار اینڈ بنچ کے مطابق عدالت نے کہا: “ہمیں گلفشاں فاطمہ فیصلے پر سنجیدہ تحفظات ہیں۔ ایسا محسوس ہوتا ہے جیسے نجیب فیصلے کو صرف ایک محدود اور غیر معمولی استثنا بنا کر پیش کیا گیا ہو۔ ہمیں اس بات پر تشویش ہے کہ نجیب فیصلے کی اصل روح کو کمزور کیا جا رہا ہے۔”

عدالت نے دو رکنی بنچ کے اس رویے پر سخت اعتراض کیا کہ اس نے بڑی بنچ کے فیصلے سے انحراف کیا۔ لائیو لا کے مطابق جسٹس اجّل بھویاں نے فیصلے میں کہا: “کم ارکان والی بنچ بڑی بنچ کے فیصلے کی پابند ہوتی ہے۔ عدالتی نظم و ضبط کا تقاضا ہے کہ ایسے فیصلوں کی پیروی کی جائے، یا اگر شبہ ہو تو معاملہ بڑی بنچ کو بھیجا جائے۔ چھوٹی بنچ کسی بڑی بنچ کے فیصلے کو کمزور، نظرانداز یا بائی پاس نہیں کر سکتی۔”

سپریم کورٹ نے UAPA کیسز میں کم سزا کی شرح کا بھی حوالہ دیا اور کہا کہ صرف اس بنیاد پر کہ کسی شخص پر UAPA لگا ہے، اس کے فوری اور منصفانہ ٹرائل کے حق کو نظرانداز نہیں کیا جا سکتا۔ واضح رہے کہ اس سے قبل سپریم کورٹ کی دو رکنی بنچ، جسٹس اروند کمار اور جسٹس این وی انجاریا نے جنوری میں عمر خالد اور شرجیل امام کی ضمانت مسترد کرتے ہوئے کہا تھا کہ ان کے خلاف UAPA کے تحت بادی النظر میں کافی مواد موجود ہے۔

عدالت نے کہا تھا کہ دونوں ملزمان کا مبینہ سازش میں “مرکزی اور ابتدائی کردار” تھا۔ عمر خالد اور شرجیل امام شہریت ترمیمی قانون (CAA) مخالف احتجاجات کے نمایاں چہرے تھے۔ دہلی فسادات کے بعد پولیس نے ان پر الزام لگایا کہ وہ فسادات کی “بڑی سازش” تیار کرنے والوں میں شامل تھے۔