لکھنؤ: سائبر ماہرین نے چین اور پاکستان سے بڑھتے ہوئے سائبر خطرات پر تشویش ظاہر کرتے ہوئے ہندوستان کو فوری طور پر محفوظ ڈیجیٹل انفرااسٹرکچر تیار کرنے کا مشورہ دیا ہے۔ یہ بات اتر پردیش فارینزک سائنس انسٹی ٹیوٹ (UPSIFS) میں منعقدہ تین روزہ بین الاقوامی سمپوزیم کے آخری دن کہی گئی، جہاں سائبر سکیورٹی، مصنوعی ذہانت (AI)، جینوم میپنگ، نسب نامہ ڈیٹا بیس اور فارینزک انصاف جیسے اہم موضوعات پر غور و خوض کیا گیا۔

ایک سرکاری بیان کے مطابق، ماہرین نے خبردار کیا کہ چین اور پاکستان کی طرف سے سائبر دراندازی میں اضافہ ہو رہا ہے، جس سے نمٹنے کے لیے ہندوستان کو فوری طور پر محفوظ اور مضبوط ڈیجیٹل نظام تیار کرنا ہوگا۔ مہاراشٹر کے پرنسپل سکریٹری برجیش سنگھ نے خبردار کیا کہ بظاہر چھوٹے نظر آنے والے سائبر واقعات بھی بڑے پیمانے پر خلل ڈال سکتے ہیں۔

انہوں نے حزب اللہ کے پیجر حملے اور میلویئر حملے کی مثال دی، جس کی وجہ سے ہندوستان کی سب سے بڑی بندرگاہ، جواہر لال نہرو پورٹ ٹرسٹ (JNPT) کو تین ماہ تک بند رہنا پڑا تھا۔ سنگھ نے عالمی سطح پر سائبر خطرات اور پولیسنگ کے منظرنامے پر روشنی ڈالتے ہوئے کہا کہ دنیا میں آج چھوٹی سی تبدیلی بھی بہت بڑا اثر ڈال سکتی ہے، اور حزب اللہ کا پیجر حملہ اس کی واضح مثال ہے۔

آسٹریلیا کے سائبر ماہر رابی ابراہام نے ورچوئل پینل ڈسکشن میں شرکت کی اور ہیکنگ کی بدلتی ہوئی تکنیکوں پر روشنی ڈالی۔ ان کا کہنا تھا کہ پہلے پروگرامنگ، اسکرپٹنگ، آپریٹنگ سسٹم، نیٹ ورکنگ پروٹوکول اور شیل کوڈ رائٹنگ جیسی پیچیدہ مہارتوں کی ضرورت ہوتی تھی، مگر اب صورتحال تبدیل ہو چکی ہے۔

انہوں نے بتایا کہ فلپائن کے ایک طالب علم نے آئی لو یو وارم نامی ایک مضر میلویئر تیار کیا تھا، جو ای میل کے ذریعے دنیا بھر میں پھیل گیا اور 8.7 ارب امریکی ڈالر کا نقصان ہوا۔ یہ سمپوزیم سائبر دنیا کے موجودہ اور مستقبل کے چیلنجز سے نمٹنے کے لیے ہندوستان کو تیار کرنے کی ایک اہم کوشش قرار دیا گیا ہے۔