گاندھی نگر (گجرات): وزیر اعلیٰ بھوپیندر پٹیل کی قیادت میں ریاستی حکومت نے ’’گجرات گرام اور نگر پنچایت ٹیکس و فیس قواعد، 1964‘‘ میں ترمیم کی ہے۔ اس کے تحت حاضر سروس فوجی اہلکاروں، ان کے شریک حیات، سابق فوجیوں اور ملک کے لیے اپنی جان قربان کرنے والے فوجیوں کی بیواؤں کی ملکیت والے رہائشی گھروں کو ’پنچایت ٹیکس‘ سے مستثنیٰ قرار دیا گیا ہے۔

گجرات وزیر اعلیٰ دفتر کے مطابق اس فیصلے سے گرام پنچایت کی حدود میں اہل مستفیدین کی ملکیت یا قبضے میں موجود ایک رہائشی مکان پر پراپرٹی ٹیکس میں چھوٹ ملے گی۔ اس سہولت کا فائدہ حاضر سروس فوجی اہلکاروں اور ان کے شریک حیات، سابق فوجیوں اور ملک کے لیے اپنی جان قربان کرنے والے فوجیوں کی بیواؤں کو حاصل ہوگا۔ یہ فیصلہ فوجیوں اور ان کے خاندانوں کو براہ راست مالی راحت فراہم کرنے کے ساتھ ملک کے لیے ان کی خدمات اور قربانی کے تئیں ریاستی حکومت کے احترام کا بھی اظہار کرتا ہے۔

فوجیوں اور ان کے اہل خانہ کے رہائشی گھروں کو پنچایت ٹیکس سے مستثنیٰ قرار دینا ان کی فلاح و بہبود کی جانب ایک اہم قدم ہے۔ ملک کے لیے اپنی جان قربان کرنے والے فوجیوں کی بیواؤں کے لیے خصوصی التزام حکومت کی حساسیت اور ان کی قربانی کے احترام کو ظاہر کرتا ہے۔ ایسے فوجیوں کے خاندانوں کے رہائشی گھروں کو ٹیکس سے چھوٹ دے کر ریاستی حکومت نے ان کے تئیں اپنی تشکر اور احسان مندی کا اظہار کیا ہے۔ ٹیکس میں یہ چھوٹ اہل مستفید کی جانب سے استعمال کیے جانے والے صرف ایک رہائشی مکان تک محدود ہوگی۔

اس التزام کا مقصد فوجیوں اور ان کے خاندانوں کے رہائشی گھروں پر ٹیکس کا بوجھ کم کرکے انہیں براہ راست مالی راحت فراہم کرنا ہے۔ یہ فیصلہ لینے سے قبل ریاستی حکومت نے موجودہ قواعد میں ترمیم کی تجویز کے ساتھ مسودہ قواعد جاری کیے تھے۔ دسمبر 2025 میں گجرات حکومت کے غیر معمولی سرکاری گزٹ میں قواعد کا مسودہ شائع کیا گیا تھا اور متعلقہ افراد سے اعتراضات اور تجاویز طلب کی گئی تھیں۔ موصولہ اعتراضات اور تجاویز پر غور کرنے کے بعد حکومت نے اب حتمی ترمیم شدہ قواعد جاری کر دیے ہیں۔

گجرات پنچایت ایکٹ، 1993 کے تحت حاصل اختیارات کا استعمال کرتے ہوئے ریاستی حکومت نے گجرات گرام اور نگر پنچایت ٹیکس و فیس (ترمیمی) قواعد، 2026 کو نوٹیفائی کر دیا ہے۔ ترمیم شدہ قواعد سرکاری گزٹ میں شائع ہونے کی تاریخ سے نافذ ہوں گے۔ ریاستی حکومت کے مطابق یہ فیصلہ فوجیوں اور ان کے خاندانوں کی فلاح و بہبود کی سمت میں ایک اہم قدم ہے۔ ملک کی حفاظت کرنے والے حاضر سروس فوجیوں، سابق فوجیوں اور اپنی جان قربان کرنے والے فوجیوں کی بیواؤں کے رہائشی گھروں کو پنچایت ٹیکس سے چھوٹ دے کر حکومت نے احترام اور تشکر کا واضح پیغام دیا ہے کہ ملک کی حفاظت کرنے والوں کے خاندانوں کے ساتھ بھی حکومت کھڑی ہے۔