سری نگر/ آواز دی وائس
جموں و کشمیر کے اُدھمپور ضلع میں سیکیورٹی فورسز نے بڑے پیمانے پر انسداد دہشت گردی مہم شروع کر دی ہے۔ سانجھی نالہ علاقے کو گھیرے میں لے لیا گیا ہے اور بسنت گڑھ کے جنگلات پر سخت نگرانی کی جا رہی ہے۔ مشتبہ دہشت گرد سرگرمیوں کے پیش نظر علاقے میں مشترکہ تلاشی مہم چلائی جا رہی ہے۔
فوج کی جانب سے اس کی تصدیق کی گئی ہے۔ بسنت گڑھ کے بیہالی علاقے میں فوج اور پولیس کے ایک مشترکہ آپریشن کے دوران دہشت گردوں سے مڈبھیڑ ہوئی۔ جموں میں واقع ’وائٹ نائٹ کور‘ کے ترجمان نے بتایا کہ دہشت گردوں سے آمنا سامنا ہوا ہے، آپریشن ابھی جاری ہے۔ اس معاملے میں مزید تفصیلات کا انتظار ہے۔
اس سے قبل منگل کے روز جموں و کشمیر کے راجوری ضلع میں لائن آف کنٹرول (ایل او سی) کے قریب اگلے مورچوں پر مشتبہ سرگرمی دیکھنے کے بعد فوج کے جوانوں نے فائرنگ کی تھی۔ وہیں پونچھ، سانبہ اور کٹھوعہ اضلاع میں 12 سے زائد مقامات پر تلاشی مہم چلائی گئی۔ افسران کے مطابق راجوری کے کیری سیکٹر کے چنگس علاقے میں صبح کے وقت چوکس جوانوں نے گھنے درختوں کی آڑ میں تین سے چار افراد کی مشتبہ نقل و حرکت دیکھی۔
افسران نے بتایا کہ فوجیوں نے دو درجن سے زیادہ گولیاں چلائیں اور ساتھ ہی تلاشی مہم بھی شروع کی۔ اس دوران ڈرونز بھی تعینات کیے گئے، تاہم مشتبہ افراد کا کوئی سراغ نہیں مل سکا۔ حکام نے مزید بتایا کہ مشتبہ سرگرمیوں کی اطلاع ملنے پر مقامی پولیس کے خصوصی آپریشن گروپ، سینٹرل ریزرو پولیس فورس اور نیشنل رائفلز نے صبح چھ بجے سے پونچھ ضلع کے سورن کوٹ اور مینڈھر علاقوں میں مشترکہ تلاشی مہم شروع کی۔
افسران کے مطابق سورن کوٹ کے سَری، اُستن، پٹھانخور، لوہار محلہ، چاندی مڑھ، فاغل، ہری ٹاپ، اور مینڈھر کے اُچاد و کلر-گرسائی میں یہ آپریشن چلایا گیا، تاہم کسی کو گرفتار نہیں کیا گیا۔ اسی کے ساتھ نیم فوجی دستوں کی مدد سے پولیس نے کٹھوعہ ضلع میں بین الاقوامی سرحد کے قریب بین نالہ، چارو مُتھی، چک دھولما، ترناہ اور چکرا گاؤں میں بھی تلاشی لی۔
.gif)
.gif)
