لکھنؤ/ آواز دی وائس

سماجوادی پارٹی کے سربراہ اکھلیش یادو کی جانب سے گزشتہ دنوں ہندوستانی جنتا پارٹی (بی جے پی) پر انتخابی بدعنوانی کا بڑا الزام لگایا گیا تھا۔ انہوں نے کہا تھا کہ بی جے پی، الیکشن کمیشن اور افسران مل کر ’ووٹ ڈکیتی‘ کر رہے ہیں۔ اس پر اب اتر پردیش کے سی ای او نے ایک بیان جاری کر کے جواب دیا ہے۔ یو پی کے چیف الیکشن آفیسر نے کہا کہ 18 ہزار حلف ناموں کے ساتھ کی گئی شکایت کا جو ذکر بار بار کیا جا رہا ہے، اس کے تعلق میں یہ واضح کیا جاتا ہے کہ کسی بھی ووٹر کے حلف نامے کی اصل کاپی دستیاب نہیں ہوئی ہے۔

۔33 اضلاع سے جڑی شکایات

انہوں نے کہا کہ ای میل کے ذریعے سماجوادی پارٹی کی طرف سے جو شکایت درج کرائی گئی ہے، اس میں تقریباً 3919 مختلف ناموں کے افراد کے حلف ناموں کی اسکین کاپی ضرور ملی ہیں۔ سی ای او نے بتایا کہ شکایتیں 33 اضلاع کے 74 اسمبلی حلقوں سے متعلق ہیں۔ 5 اسمبلی حلقوں کی شکایت کی جانچ مکمل ہو چکی ہے۔ انہوں نے کہا کہ ایکس کے ذریعے عام عوام کے سامنے جانچ کا نتیجہ بھی رکھا جا چکا ہے۔

جانچ میں کیا آیا سامنے

انہوں نے بتایا کہ اب تک جن پانچ اسمبلی حلقوں کی جانچ مکمل ہوئی ہے ان میں یہ پایا گیا ہے کہ ایسے افراد کے نام سے نومبر 2022 میں حلف نامے تیار کیے گئے، جن کی موت سال 2022 سے کئی سال پہلے ہو چکی تھی۔ ان افراد نے اپنے نام سے بنے حلف نامے کی اسکین کاپی دیکھنے پر ایسا کوئی بھی بیان دینے سے صاف انکار کر دیا ہے۔ قابل ذکر ہے کہ قانونی طور پر غلط ثبوت دینا جرم سمجھا جاتا ہے۔

کیا تھا اکھلیش کا الزام

اکھلیش یادو نے الزام لگایا تھا کہ بی جے پی غریبوں کا ووٹ کٹوا رہی ہے۔ ان کا کہنا تھا کہ سماجوادی پارٹی نے سال 2022 میں غلط طریقے سے کاٹے گئے ووٹوں کو لے کر آواز اٹھائی تو الیکشن کمیشن نے نوٹس بھیج دیا تھا۔ سماجوادی پارٹی نے ووٹر لسٹ سے ڈیلیٹ کیے گئے 18 ہزار ووٹروں کی فہرست حلف ناموں کے ساتھ الیکشن کمیشن کو بھیجی تھی، لیکن الیکشن کمیشن نے کوئی کارروائی نہیں کی۔ ان کا کہنا تھا کہ جب ووٹ چوری اور ووٹ کاٹنے کا معاملہ اٹھا تو چیف الیکشن کمیشن نے کہہ دیا کہ کوئی حلف نامہ نہیں ملا۔