نئی دہلی/ آواز دی وائس
مغربی بنگال کے دارالحکومت کولکتہ میں ای ڈی (انفورسمنٹ ڈائریکٹوریٹ) نے بڑی کارروائی کی ہے۔ ای ڈی نے اندو بھوشن ہلدار عرف دُلال کو گرفتار کر لیا ہے۔ یہ گرفتاری پاکستان کے شہری آزاد حسین عرف آزاد ملک عرف احمد حسین آزاد کے معاملے میں عمل میں آئی ہے۔ ہلدار کو کولکاتہ کی "بچار بھون" اسپیشل کورٹ میں پیش کیا گیا، جہاں سے ای ڈی کو پانچ دن کی حراست کی منظوری دی گئی تاکہ مزید تفتیش کی جا سکے۔
ای ڈی کی تفتیش مغربی بنگال پولیس کی جانب سے درج ایک ایف آئی آر سے شروع ہوئی تھی، جو "فارنرز ایکٹ 1946" کی دفعات 14 اور 14اے کے تحت درج کی گئی تھی۔ تفتیش میں انکشاف ہوا کہ آزاد حسین دراصل پاکستان کا شہری ہے۔ ای ڈی نے بتایا کہ ملزم ہندوستان میں آزاد ملک کے نام سے جعلی شناخت پر رہ رہا تھا۔ وہ رقم لے کر بنگلہ دیش سے آنے والے غیر قانونی مہاجرین کے لیے ہندوستانی شناختی کارڈ بنوانے کا کام کرتا تھا۔
آزاد حسین کو 15 اپریل 2025 کو گرفتار کیا گیا
ای ڈی نے بتایا کہ آزاد حسین کو 15 اپریل 2025 کو گرفتار کیا گیا تھا اور وہ اس وقت عدالتی حراست میں ہے۔ مزید تفتیش میں پتہ چلا کہ اس نے کئی بنگلہ دیشی شہریوں کو ہندوستانی پاسپورٹ دلانے کے لیے اندو بھوشن ہلدار سے رابطہ کرایا تھا۔ اندو بھوشن ہلدار نادیا ضلع کے چکدہ کا رہنے والا ہے اور اس پورے ریکیٹ کا اہم رکن ہے۔
۔ 250 جعلی پاسپورٹ، بچنے کے لیے ہائی کورٹ میں درخواست
ای ڈی کے مطابق اندو بھوشن ہلدار پاسپورٹ کے لیے جعلی دستاویزات تیار کرنے اور درخواست جمع کرانے کا کام کرتا تھا، جس کے بدلے میں وہ بھاری رقم وصول کرتا تھا۔ اب تک ای ڈی کی تحقیقات میں تقریباً 250 جعلی پاسپورٹ معاملات سامنے آئے ہیں جن میں ہلدار کا براہِ راست کردار پایا گیا ہے۔ ہلدار نے پہلے ضمانت قبل از گرفتاری کے لیے کولکاتہ کی اسپیشل پی ایم ایل اے کورٹ اور بعد میں ہائی کورٹ میں درخواست دائر کی تھی، لیکن دونوں عدالتوں نے اس کی درخواست مسترد کر دی۔
ای ڈی نیٹ ورک سے جڑے دیگر افراد کی تلاش میں مصروف
ای ڈی نے بتایا کہ اس سے پہلے 13 جون 2025 کو آزاد حسین عرف آزاد ملک کے خلاف منی لانڈرنگ کی روک تھام سے متعلق قانون کے تحت استغاثہ کی شکایت داخل کی گئی تھی، جس پر 19 جون 2025 کو عدالت نے نوٹس لیا تھا۔ ای ڈی کا کہنا ہے کہ اس پورے نیٹ ورک سے منسلک دیگر افراد کی شناخت کے لیے تفتیش جاری ہے۔ امکان ہے کہ اس معاملے میں مزید گرفتاریاں بھی ہو سکتی ہیں۔
