نئی دہلی/ آواز دی وائس

ملک میں غیر قانونی آن لائن بیٹنگ پلیٹ فارمز کے معاملات مسلسل بڑھتے جا رہے ہیں۔ اسی دوران انفورسمنٹ ڈائریکٹوریٹ (ای ڈی) ممبئی کی ٹیم نے غیر قانونی آن لائن بیٹنگ پلیٹ فارم پیری میچ پر بڑا ایکشن لیا ہے۔ ای ڈی نے منی لانڈرنگ کی روک تھام کے قانون کے تحت ممبئی، دہلی، نوئیڈا، جے پور، سورت، مدورئی، کانپور اور حیدرآباد میں 17 مقامات پر چھاپے مارے۔ اس کارروائی میں تقریباً 110 کروڑ روپے کی رقم، جو مختلف افراد یا کمپنیوں کے بینک کھاتوں میں رکھی گئی تھی اور جنہیں "میول اکاؤنٹ" (ایسے کھاتے جو دوسروں کے پیسے رکھنے اور گھمانے کے لیے استعمال ہوتے ہیں) کے طور پر چلایا جا رہا تھا، فریز کر دی گئی۔ اس کے علاوہ متعدد اہم دستاویزات اور ڈیجیٹل ڈیوائسز بھی ضبط کر لی گئی ہیں۔

ایک سال میں 3,000 کروڑ روپے سے زیادہ کی کمائی

کچھ وقت پہلے سائبر پولیس اسٹیشن، ممبئی نے پیری میچ.کام کے خلاف ایف آئی آر درج کی تھی، جس کی بنیاد پر ای ڈی نے تفتیش شروع کی۔ الزام ہے کہ یہ پلیٹ فارم آن لائن سٹے بازی کے ذریعے صارفین کو دھوکہ دے کر بھاری منافع کماتا تھا۔ تحقیقات میں پتا چلا کہ لوگوں کو منافع کا لالچ دے کر صرف ایک سال میں 3,000 کروڑ روپے سے زیادہ کمائے گئے۔

میول اکاؤنٹس کے ذریعے پیسے کی ہیرا پھیری

تحقیقات میں یہ بھی سامنے آیا کہ پیری میچ نے پورے ملک میں مختلف طریقوں سے پیسہ "میول اکاؤنٹس" کے ذریعے گھمایا۔ تمل ناڈو میں صارفین کا پیسہ میول اکاؤنٹس میں جمع کرا کے نقدی نکالی گئی اور حوالہ آپریٹرز کو دی گئی۔ حوالہ والوں نے یہ نقدی برطانیہ کی ایک کمپنی کے ورچوئل والٹ میں ڈلوائی، جسے بعد میں یو ایس ڈی ٹی کرپٹو کرنسی خریدنے کے لیے استعمال کیا گیا۔

مقامی منی ٹرانسفر ایجنٹس کی مدد

اس کے علاوہ مغربی ہندوستان میں پیری میچ نے مقامی منی ٹرانسفر ایجنٹس کی مدد لی۔ ان ایجنٹس کے میول اکاؤنٹس میں جمع رقم کو میول کریڈٹ کارڈز کے ذریعے پیری میچ کے ایجنٹس تک پہنچایا جاتا تھا۔ ای ڈی کو چھاپے کے دوران صرف ایک جگہ سے 1,200 سے زیادہ ایسے کریڈٹ کارڈ ملے۔

یوں چلتا تھا پورا کھیل

کچھ پیمنٹ کمپنیاں جن کے پیمنٹ ایگریگیٹر لائسنس کو آر بی آئی نے مسترد کر دیا تھا، انہوں نے پیری میچ کو "ٹیکنالوجی سروس پرووائیڈر" بن کر اپنی خدمات دیں۔ ان کمپنیوں نے پیری میچ کے ایجنٹس کو اے پی آئی فراہم کی، جس کے ذریعے ای-کامرس اور پیمنٹ سلوشن فراہم کرنے والی کمپنیوں کے نام پر میول اکاؤنٹس کھولے گئے۔ ان کھاتوں میں یو پی آئی کے ذریعے رقم جمع ہوتی تھی، جسے بعد میں ای-کامرس ریفنڈ، چارج بیک، وینڈر پیمنٹ جیسی جعلی انٹریوں کے ذریعے گھما کر اصلی سورس اور استعمال کو چھپایا جاتا تھا۔

پیری میچ نے ہندوستان میں جم کر مارکیٹنگ کی

پیری میچ نے ہندوستان میں پہچان بنانے کے لیے بڑے پیمانے پر مارکیٹنگ کی، کھیلوں کے ٹورنامنٹ اسپانسر کیے اور مشہور شخصیات کے ساتھ پارٹنرشپ کی۔ انہوں نے پیری میچ اسپورٹس اور پیری میچ نیوز کے نام سے ہندوستانی کمپنیاں بنا کر اشتہارات چلائے۔ ان کمپنیوں کو ادائیگی غیر ملکی ترسیلات زر کے ذریعے کی گئی۔