آواز دی وائس / نئی دہلی

انفورسمنٹ ڈائریکٹوریٹ (ای ڈی) نے جمعہ کو جموں و کشمیر کے سابق وزیر اعلیٰ اور نیشنل کانفرنس لیڈر فاروق عبداللہ کو جموں و کشمیر کرکٹ ایسوسی ایشن (جے کے سی اے) کے فنڈز میں مبینہ طور پربدعنوانی کے الزام میں سمن جاری کیا۔

 فاروق عبداللہ کو 31 مئی2022 کو ای ڈی کے چندی گڑھ کے دفتر میں تحقیقات میں شامل ہونے کو کہا گیا ہے۔

ای ڈی نے اس سے قبل 2019 اور 2020 میں دو مواقع پر اسی معاملے میں فاروق عبداللہ سے پوچھ گچھ کی تھی۔ پچھلی بار ای ڈی نے جموں و کشمیر کے راج باغ میں واقع اپنے علاقائی دفتر میں 84 سالہ رہنما سے پوچھ گچھ کی تھی۔ ای ڈی نے منی لانڈرنگ کی روک تھام ایکٹ (پی ایم ایل اے) کے تحت دونوں موقعوں پرفاروق عبداللہ کا بیان ریکارڈ کیا تھا۔

اس سے پہلی بار جنوری 2018 میں سنٹرل بیورو آف انویسٹی گیشن (سی بی آئی) کی ایک ٹیم نے مبینہ گھوٹالے میں پوچھ گچھ کی تھی۔ معاملے کی تحقیقات ابھی جاری ہے۔ ای ڈی نے سی بی آئی ایف آئی آر کا نوٹس لیتے ہوئے منی لانڈرنگ کا مقدمہ درج کیا، جس میں جے کے سی اے کے سابق عہدیداروں بشمول جنرل سکریٹری محمد سلیم خان اور سابق خزانچی احسن احمد مرزا کے خلاف مقدمہ درج کیا گیا۔

سنہ 2015 میں جموں و کشمیر ہائی کورٹ نے جموں و کشمیر کرکٹ ایسوسی ایشن میں مبینہ 113 کروڑ روپے کے گھپلے کی تحقیقات سی بی آئی کو سونپ دی، اور ریاستی پولیس کو اس تحقیقات میں ناکامی کا ذمہ دار ٹھہرایا۔

فاروق عبداللہ اس گھوٹالے میں عبداللہ کے نام کا حوالہ دیتے ہوئے اور جانچ سی بی آئی کو سونپنے کی وجوہات کا حوالہ دیتے ہوئے، عدالت نے کہا تھا کہ جے کے سی اے کے صدر ایک "سیاسی شخصیت" تھے جنہوں نے ریاست کے وزیر اعلی اورمرکز میں وزیر کے طور پر کام کیا ہے۔

ان پر الزام ہے کہ انہوں نے 2011 کے انتخابات کے بعد خزانچی نہ ہونے کے باوجود ملزم احسن مرزا کو مالی معاملات پر کنٹرول میں رکھنے کے لیے جے کے سی اے کے جعلی اکاؤنٹس کے آپریشن سے متعلق دو متضاد قراردادوں کو کلیئر کرنے میں ملوث ہونے کا الزام عائد کیا۔