نئی دہلی: سپریم کورٹ نے جمعرات کو ان درخواستوں کو سماعت کے لیے فہرست میں شامل کرنے پر رضامندی ظاہر کی، جن میں منی لانڈرنگ کے معاملات میں انفورسمنٹ ڈائریکٹوریٹ (ای ڈی) کو گرفتاری، جائیداد ضبط کرنے اور تلاشی و ضبطی کے اختیارات دینے والے 2022 کے فیصلے پر نظرثانی کی درخواست کی گئی ہے۔

چیف جسٹس سوریہ کانت، جسٹس جوی مالیا باگچی اور جسٹس وی. موہنا کی بنچ نے سینئر وکیل کپل سبل کی دلائل کا نوٹس لیا۔ سبل کانگریس لیڈر کارتی چدمبرم کی جانب سے پیش ہوئے اور کہا کہ ان درخواستوں پر اگست 2022 میں ہی نوٹس جاری کیے جا چکے تھے اور اب ان پر سماعت ضروری ہے۔

چیف جسٹس نے کہا، ’’معاملے کو بنچ کی تشکیل کے حوالے سے فریقین کی رضامندی درج کرنے کے لیے فہرست میں شامل کیا گیا ہے۔‘‘ انہوں نے کہا کہ اگر ان معاملات کو اسی بنچ کے سامنے فہرست میں شامل کرنا ہے جس نے پہلے ان پر سماعت کی تھی تو موجودہ تین بنچوں کی تشکیل نو کرنا ہوگی، کیونکہ دیگر دو جج اب الگ الگ بنچوں میں سماعت کر رہے ہیں۔

بنچ نے کہا کہ معاملے کی عجلت کو دیکھتے ہوئے اب اس پر چیف جسٹس سوریہ کانت، جسٹس باگچی اور جسٹس موہنا کی بنچ سماعت کرے گی۔ اگلی سماعت کی تاریخ بعد میں مقرر کی جائے گی۔ گزشتہ سال 31 جولائی کو بنچ نے کہا تھا کہ وہ پہلے 2022 کے فیصلے کے خلاف دائر نظرثانی درخواستوں کی قابلِ سماعت ہونے کی حیثیت کے معاملے پر دلائل سنے گی۔ 2022 کے فیصلے میں سپریم کورٹ نے انسدادِ منی لانڈرنگ ایکٹ (پی ایم ایل اے) کے تحت ای ڈی کے گرفتاری، منی لانڈرنگ سے متعلق جائیدادیں ضبط کرنے اور تلاشی و ضبطی کے اختیارات کو برقرار رکھا تھا۔

بنچ نے کہا تھا کہ ای ڈی نے تین ابتدائی مسائل اٹھائے ہیں، جو بنیادی طور پر نظرثانی درخواستوں کی قابلِ سماعت ہونے کے سوال سے متعلق ہیں۔ عدالت نے کہا تھا کہ درخواست گزاروں نے اس کے غور کے لیے 13 سوالات پیش کیے ہیں۔ بنچ نے کہا تھا، ’’چونکہ پیش کیے گئے مسائل نظرثانی کی کارروائی سے متعلق ہیں، اس لیے ہم پہلے نظرثانی درخواستوں کی قبولیت کے معاملے پر فریقین کو سننا چاہتے ہیں۔ اس کے بعد نظرثانی درخواست گزاروں کی جانب سے اٹھائے گئے سوالات پر سماعت کی جائے گی۔‘‘