نئی دہلی/ آواز دی وائس

ای ڈٰی نے رابرٹ واڈرا کے خلاف چارج شیٹ دائر کر دی ہے۔ یہ چارج شیٹ یو کے میں مقیم دفاعی ڈیلر سنجے بھنڈاری سے متعلق منی لانڈرنگ کے معاملے میں داخل کی گئی ہے۔ ای ڈی نے یہ چارج شیٹ دہلی کے راؤز ایونیو کورٹ میں فائل کی ہے۔ ذرائع کے مطابق واڈرا کا بیان اسی سال جولائی میں پی ایم ایل اے کے تحت ریکارڈ کیا گیا تھا۔

اس کیس کی شروعات اس وقت ہوئی جب انکم ٹیکس ڈپارٹمنٹ نے 22 ستمبر 2016 کو ای ڈی کو ایک نوٹس بھیجا۔ بعد ازاں 9 فروری 2017 کو ایک اور خط موصول ہوا، جس میں کہا گیا کہ آرمز ڈیلر سنجے بھنڈاری نے اپنی غیر ملکی جائیدادیں—خصوصاً غیر ملکی بینک اکاؤنٹس اور لندن کی پراپرٹی—چھپا رکھی ہیں۔

قانون کے مطابق یہ ایک سنگین جرم ہے اور بلیک منی ایکٹ 2015 کے تحت کارروائی شروع کی گئی۔ 3 اپریل 2018 کو انکم ٹیکس ڈپارٹمنٹ نے ای ڈی کو مطلع کیا کہ انہیں سیکشن 55 کے تحت منظوری مل گئی ہے کہ سنجے بھنڈاری کے خلاف سیکشن 51(1) بلیک منی ایکٹ کے تحت مقدمہ چلایا جا سکتا ہے۔ یہ جرم پی ایم ایل اے میں بھی شیڈیولڈ آفنس کے طور پر درج ہے۔

جانچ کے دوران انکم ٹیکس ڈپارٹمنٹ نے بھنڈاری کے ٹھکانوں پر چھاپے مارے، جہاں سے ملنے والے ڈیجیٹل ڈیٹا نے معاملے کو نیا رخ دے دیا۔ اس ڈیٹا میں موجود ای میلز سے لندن کے برائن اسٹن اسکوائر میں واقع 12 نمبر کی ایک پراپرٹی (جس کی قیمت تقریباً 1.9 ملین پاؤنڈ) کی تفصیلات سامنے آئیں۔ ان ای میلز میں شامل نام تھے

سُمت چڈّھا (یو کے میں بھنڈاری کا رشتہ دار)

رابرٹ واڈرا

منوج اروڑا (واڈرا کے پرسنل اسسٹنٹ)

ای میلز کی بنیاد پر ایجنسیاں دعویٰ کر رہی ہیں کہ رابرٹ واڈرا اس پراپرٹی کو ’’بینیفیشیئلی کنٹرول‘‘ کر رہے تھے۔ پراپرٹی کی مرمت اور اخراجات کا انتظام بھی ان کی طرف سے کیا جا رہا تھا۔ 30 جون 2010 کو: تقریباً اتنی ہی رقم پراپرٹی فروخت ہونے کے بعد دوبارہ اسی اکاؤنٹ میں واپس آئی۔ ایجنسیوں کا کہنا ہے کہ پراپرٹی خریدی اور بیچی ایک ہی قیمت پر گئی، جبکہ 65,900 پاؤنڈ کے قریب مرمت پر خرچ کیے گئے تھے۔ اس سے شک گہرا ہوتا ہے کہ اصل مالک کوئی اور تھا اور بھنڈاری صرف فرنٹ کے طور پر استعمال ہو رہے تھے۔

جاںچ میں ایک ای میل (تاریخ: 5 جولائی 2010) بھی ملا جس میں ظاہر ہوا کہ پراپرٹی فروخت ہونے کے بعد بھی خرچ کا حساب منوج اروڑا کو بھیجا جا رہا تھا۔ اس کے بعد ای ڈی نے بھی واڈرا کے قریبی لوگوں کے ٹھکانوں پر چھاپے مارے اور کئی دستاویزات ضبط کیے۔

رابرٹ واڈرا کے خلاف مزید الزامات

ای ڈی نے 2023 میں ایک چارج شیٹ دائر کی تھی جس میں کہا گیا تھا کہ:

سنجے بھنڈاری نے 2009 میں لندن کی یہ پراپرٹی خریدی تھی

اور اس کی مرمت رابرٹ واڈرا کے حکم پر کرائی گئی

مرمت کے اخراجات کا انتظام بھی واڈرا ہی کر رہے تھے۔

واڈرا نے ان الزامات کی سختی سے تردید کی ہے اور کہا ہے کہ ان کی لندن میں کوئی جائیداد نہیں ہے—نہ براہِ راست اور نہ بالواسطہ۔ انہوں نے ان الزامات کو “سیاسی سازش” قرار دیتے ہوئے کہا کہ انہیں سیاسی مقصد پورا کرنے کے لیے ہراساں کیا جا رہا ہے۔ ای ڈی واڈرا کے خلاف راجستھان کے بیكانیر میں ایک زمین کے سودے میں مبینہ مالی بے ضابطگیوں کے الگ معاملے میں بھی تفتیش کر رہی ہے۔