نئی دہلی: صدر دروپدی مرمو نے جمعہ کو کہا کہ ملک کا ہتھ کرگھا شعبہ روزگار کے وسیع مواقع فراہم کرتا ہے اور ای کامرس پلیٹ فارم کے ذریعے اس کی مصنوعات کی عالمی بازاروں تک رسائی مزید بڑھائی جا سکتی ہے۔ مرمو نے ’12ویں قومی ہتھ کرگھا دن‘ کی تقریب سے خطاب کرتے ہوئے کہا کہ اس شعبے سے تقریباً 35 لاکھ افراد وابستہ ہیں، جن میں 25 لاکھ سے زیادہ خواتین شامل ہیں۔

انہوں نے امید ظاہر کی کہ ہتھ کرگھا شعبہ ملک کی جامع ترقی کی ایک مضبوط بنیاد بنے گا۔ صدر نے کہا، ’’ہتھ کرگھا شعبہ نہ صرف روزگار کا ایک اہم ذریعہ ہے بلکہ یہ ہماری مالا مال ثقافتی وراثت کی علامت بھی ہے۔ ڈیجیٹل پلیٹ فارم اور ای کامرس کے ذریعے ہندوستانی ہتھ کرگھا مصنوعات کی عالمی شناخت کو مزید مضبوط کیا جا سکتا ہے۔‘

‘ صدر بھون کے ثقافتی مرکز میں منعقدہ تقریب سے خطاب کرتے ہوئے انہوں نے کہا کہ حکومت اور دیگر متعلقہ فریقوں کے تعاون سے یہ شعبہ آنے والے وقت میں مزید مضبوط ہوگا اور دیہی معیشت کو تقویت دے گا۔ اس موقع پر صدر مرمو نے ’سنت کبیر ہتھ کرگھا ایوارڈ‘ اور ’قومی ہتھ کرگھا ایوارڈ 2025‘ بھی پیش کیے۔ ان ایوارڈز کے ذریعے بہترین بُنکروں اور کاریگروں کی خدمات کو اعزاز سے نوازا جاتا ہے۔