نئی دہلی/ آواز دی وائس

مرکزی صارفین تحفظ اتھارٹی  نے درشتی آئی اے ایس کوچنگ پر پانچ لاکھ روپے کا جرمانہ عائد کیا ہے۔ یہ جرمانہ کوچنگ ادارے کی جانب سے یو پی ایس سی سول سروس امتحان 2022 کے نتائج کے بارے میں گمراہ کن اشتہار شائع کرنے پر لگایا گیا ہے۔ آئیے جانتے ہیں پورا معاملہ کیا ہے جس کی وجہ سے یہ جرمانہ عائد ہوا۔ اس کوچنگ ادارے کا انتظام وکاس دیویاکیرتی کے ذریعے کیا جاتا ہے۔

میڈیا رپورٹس کے مطابق کوچنگ ادارے نے اپنے اشتہار میں دعویٰ کیا تھا کہ یو پی ایس سی سی ایس ای 2022 میں 216 سے زیادہ امیدوار کامیاب ہوئے ہیں، جن کے نام اور تصاویر بھی شامل کی گئی تھیں۔ جب اس معاملے کی جانچ CCPA نے کی تو پتا چلا کہ امیدواروں کے ذریعے لیے گئے کورسز کی نوعیت اور مدت کے بارے میں اہم معلومات کو چھپایا گیا تھا۔

جانچ میں ہوا انکشاف: اشتہار میں چھپائی گئی معلومات

تحقیق میں یہ سامنے آیا کہ 216 امیدواروں میں سے 162 صرف ادارے کے مفت انٹرویو گائیڈنس پروگرام (آئی جی پی) میں شامل ہوئے تھے۔ ان امیدواروں نے ابتدائی اور مین امتحان اپنی محنت سے پاس کیا تھا۔ صرف 54 امیدوار ہی اس پروگرام کے علاوہ دیگر کورسز میں رجسٹرڈ تھے۔ اس معلومات کو چھپانا صارفین تحفظ ایکٹ 2019 کی دفعہ 2 (28) کے تحت گمراہ کن اشتہار کے زمرے میں آتا ہے۔ اس سے قبل بھی ادارے پر اسی طرح کے معاملے میں 3 لاکھ روپے کا جرمانہ لگایا جا چکا ہے۔

اب تک 26 اداروں پر لگ چکا ہے جرمانہ

CCPA نے یہ بھی ذکر کیا کہ ستمبر 2024 میں یو پی ایس سی سی ایس ای 2021 میں 150 سے زیادہ امیدواروں کے انتخاب کے گمراہ کن دعوے کے لیے درشتی آئی اے ایس پر 3 لاکھ روپے کا جرمانہ عائد کیا گیا تھا۔ ادارے نے 161 امیدواروں کی تفصیل دی تھی جو درست نہیں تھی۔ اب تک CCPA کی جانب سے مختلف کوچنگ اداروں کو 54 نوٹس گمراہ کن اشتہارات کے سلسلے میں جاری کیے جا چکے ہیں۔ وہیں 26 کوچنگ اداروں پر 90.6 لاکھ روپے سے زیادہ کا جرمانہ لگایا گیا ہے۔ ساتھ ہی ان اشتہارات کو فوراً بند کرنے کی ہدایت بھی دی گئی ہے۔