نئی دہلی : اداکار سلمان خان کے پرسنالٹی رائٹس سے متعلق ایک معاملے میں دہلی ہائی کورٹ نے ایک چینی اے آئی وائس پلیٹ فارم کی جانب سے دائر درخواست پر غور کرنے پر رضامندی ظاہر کی ہے۔ اس چینی اے آئی پلیٹ فارم نے دہلی ہائی کورٹ کے اُس حکم کو چیلنج کیا ہے جس کے تحت سلمان خان کی آواز، نام، تصویر اور شناخت کے تجارتی غلط استعمال پر پابندی عائد کی گئی تھی۔

دہلی ہائی کورٹ نے اس معاملے میں اداکار سلمان خان کو نوٹس جاری کرتے ہوئے ان سے درخواست پر اپنا موقف پیش کرنے کو کہا ہے۔ عدالت نے سلمان خان کو جواب داخل کرنے کے لیے چار ہفتوں کا وقت دیا ہے۔ ہائی کورٹ نے واضح کیا کہ تمام فریقین کے دلائل سننے کے بعد ہی آئندہ کارروائی کا فیصلہ کیا جائے گا۔

دہلی ہائی کورٹ نے اس معاملے کی اگلی سماعت کے لیے 27 فروری کی تاریخ مقرر کی ہے۔ اس سے قبل دہلی ہائی کورٹ نے سلمان خان کے پرسنالٹی رائٹس کے تحفظ کو یقینی بناتے ہوئے بغیر اجازت ان کے نام، آواز اور دیگر شناختی عناصر کے استعمال پر پابندی لگا دی تھی۔ اگر سلمان خان کے ورک فرنٹ پر نظر ڈالیں تو انہیں آخری بار فلم “سکندر” میں دیکھا گیا تھا، جس میں ان کے مقابل اداکارہ رشمیکا مندانا تھیں۔

یہ فلم باکس آفس پر ناکام رہی اور اسے منفی ریویوز کا سامنا کرنا پڑا۔ اب سلمان خان کے ہاتھ میں فلم “دی بیٹل آف گلوان” ہے، جسے لے کر خاصا چرچا ہے۔ اس فلم کے لیے سلمان خان نے سخت محنت کی ہے اور شوٹنگ کے دوران وہ زخمی بھی ہو گئے تھے۔

اس فلم کی ہدایت کاری اپوروہ لکھیا کر رہے ہیں۔ فلم میں سلمان خان کے ساتھ چترانگدا سنگھ، انکور بھاٹیا، ابھیلاش چودھری اور ہیرا سوہل جیسے اداکار بھی شامل ہیں۔ فلم سے سلمان خان کا نیا لک بھی سامنے آ چکا ہے، جسے مداحوں کی جانب سے خوب پسند کیا جا رہا ہے۔