نئی دہلی: سپریم کورٹ نے مسلم مطلقہ خواتین کے حقوق سے متعلق ایک اہم فیصلے میں قرار دیا ہے کہ شوہر کو وہ تمام سونا اور نقد رقم واپس کرنا لازمی ہے جو شادی کے موقع پر خاتون کے والد نے اسے دی تھی۔ عدالت نے واضح کیا کہ 1986 کے مسلم خواتین (تحفظِ حقوقِ طلاق) قانون کی روح مساوات، وقار اور خودمختاری پر قائم ہے، اور اس کی تشریح کرتے وقت خواتین کے حقیقی معاشرتی تجربات اور زمینی حقائق کو پیشِ نظر رکھنا ضروری ہے، کیونکہ آج بھی خاص طور پر چھوٹے شہروں اور دیہی علاقوں میں پدرشاہی رویّے پوری شدت کے ساتھ موجود ہیں۔

جسٹس سنجے کروَل اور جسٹس این کوٹیشور سنگھ پر مشتمل بنچ نے کلکتہ ہائی کورٹ کے اس فیصلے کو منسوخ کر دیا جس میں خاتون کی جانب سے شوہر کو دیے گئے سات لاکھ روپے اور سونے کی واپسی کا مطالبہ مسترد کر دیا گیا تھا۔ ہائی کورٹ کے فیصلے کے خلاف خاتون نے سپریم کورٹ سے رجوع کیا تھا۔

درخواست گزار خاتون کے مطابق اس کی شادی 2005 میں ہوئی، اور 2009 میں میاں بیوی علیحدہ ہوگئے۔ بعد ازاں 2011 میں دونوں میں طلاق ہو گئی۔ طلاق کے بعد خاتون نے شادی کے وقت دیے گئے نقد رقم اور سونے کی واپسی کے لیے درخواست دائر کی، جس کی مجموعی مالیت 17.67 لاکھ روپے بتائی گئی۔ یہ اپیل 1986 کے قانون کی دفعہ 3 کے تحت دائر کی گئی تھی۔

ہائی کورٹ نے خاتون کا دعویٰ محض اس بنیاد پر مسترد کیا تھا کہ خاتون کے والد اور نکاح خوان (قاضی) کے بیانات میں تضاد موجود ہے۔
قاضی کے مطابق نکاح رجسٹر میں رقم درج تو کی گئی تھی مگر رقم وصول کرنے والے کا نام درج نہیں تھا، جبکہ والد نے بیان دیا تھا کہ یہ رقم براہِ راست دولہے کو دی گئی تھی۔

سپریم کورٹ نے اس بنیاد کو ناقص قرار دیتے ہوئے کہا کہ اگر کیس میں دو تشریحات ممکن ہوں تو عدالت صرف اس وجہ سے اپنے اختیارات استعمال نہیں کرتی کہ مختلف آرا موجود ہیں، لیکن اس معاملے میں ہائی کورٹ نے مقصدی تشریح کا اصول ملحوظ نہیں رکھا اور اسے ایک عام دیوانی تنازعہ سمجھ کر نمٹا دیا، جو قانون اور انصاف دونوں کے خلاف ہے۔

بینچ نے کہا کہ آئینِ ہند مساوات کا خواب پیش کرتا ہے جسے عملی جامہ پہنانا عدالتوں کی ذمہ داری ہے۔ اس کے مطابق عدالتی استدلال کو ایسے فیصلوں کی طرف لے جانا ہوگا جو سماجی انصاف پر مبنی ہوں۔

 عدالت نے 1986 کے قانون کی دفعہ 3 کی تشریح کرتے ہوئے اس بات پر زور دیا کہ شادی کے وقت دی جانے والی جائیدادیں، جیسا کہ دفعہ 3(1)(d) میں بیان کیا گیا ہے، ایک مطلقہ عورت کے مستقبل کو محفوظ بنانے کے لیے ہوتی ہیں۔ لہٰذا عدالتوں پر لازم ہے کہ وہ اس دفعہ کی ایسی تعبیر اختیار کریں جو اس کے تحفظ کے مقصد کو پورا کرے۔

دفعہ 3(1)(d) کے مطابق، ایک مطلقہ مسلم عورت اس تمام جائیداد کی حق دار ہے جو اسے شادی سے پہلے، شادی کے وقت، یا شادی کے بعد اس کے رشتہ داروں، دوستوں، شوہر، شوہر کے رشتہ داروں یا اس کے دوستوں کی جانب سے دی گئی ہو۔

عدالت نے اپنے مشاہدے میں کہا کہ مندرجہ بالا دفعہ مہر/جہیز یا شادی کے وقت دی جانے والی دیگر جائیداد سے متعلق ہے، جو اس بات کی راہ ہموار کرتی ہے کہ عورت مذکورہ حالات میں اپنے شوہر کے خلاف دعویٰ دائر کر سکتی ہے یا اس سے جائیداد واپس مانگ سکتی ہے۔

سپریم کورٹ نے مزید کہا:"1986 کا قانون مسلم مطلقہ خاتون کو طلاق کے بعد زندگی گزارنے کے لیے وقار اور معاشی تحفظ فراہم کرنے کے مقصد سے بنایا گیا تھا۔ آئین کے آرٹیکل 21 کے تحت ملنے والے حقوق کا تقاضا ہے کہ اس قانون کی تشریح کرتے وقت مساوات، وقار اور خودمختاری کو اولین حیثیت دی جائے، اور خواتین کے حقیقی تجربات کو پیشِ نظر رکھا جائے، کیونکہ پدرشاہی امتیاز آج بھی بڑی شدت سے موجود ہے۔"

عدالت نے خاتون کی اپیل منظور کرتے ہوئے ہائی کورٹ کے فیصلے کو مکمل طور پر کالعدم قرار دے دیا۔ بنچ نے خاتون کے وکیل سے کہا کہ وہ فیصلہ سنائے جانے کے تین کام کے دنوں کے اندر اپنے مؤکلہ کے بینک اکاؤنٹ کی تفصیلات اور دیگر ضروری معلومات شوہر کے وکیل کو فراہم کریں۔

عدالت نے ہدایت دی کہ رقم براہِ راست خاتون کے بینک اکاؤنٹ میں منتقل کی جائے اور مدعا علیہ (شوہر) چھ ہفتوں کے اندر عدالت کی رجسٹری میں تعمیل کا حلف نامہ جمع کرائے۔ یہ حلف نامہ ریکارڈ کا حصہ بنایا جائے گا۔سپریم کورٹ نے یہ بھی کہا کہ اگر شوہر مقررہ مدت میں رقم ادا نہ کرے تو اسے 9 فیصد سالانہ سود کے ساتھ پوری رقم ادا کرنا ہوگی