نئی دہلی: سپریم کورٹ نے جمعرات کو تمام ہائی کورٹس کو ہدایت دی کہ وہ ملک بھر میں تیزاب حملوں سے متعلق زیرِ التوا مقدمات کی مکمل تفصیلات چار ہفتوں کے اندر عدالت میں پیش کریں۔ عدالت نے دہلی کی ایک عدالت میں تیزاب حملے کا مقدمہ 16 سال سے زیرِ التوا رہنے کو "شرمناک" قرار دیا۔

چیف جسٹس آف انڈیا (سی جے آئی) سوریا کانت اور جسٹس جوئے مالیہ باگچی پر مشتمل بنچ نے تیزاب حملے کی متاثرہ شاہین ملک کی جانب سے دائر عوامی دلچسپی کی عرضی پر سماعت کرتے ہوئے مرکز اور محکمہ برائے بااختیار سازیِ معذوران کو بھی نوٹس جاری کیا۔

بنچ نے شاہین ملک کے مقدمے میں طویل تاخیر کو "قومی سطح پر شرمندگی" قرار دیا۔ یہ مقدمہ روہنی کی ایک عدالت میں 2009 سے زیرِ التوا ہے۔ بنچ نے کہا: "یہ عدالتی نظام کا کیسا مذاق ہے؟ یہ بہت ہی شرمناک بات ہے۔ اگر قومی دارالحکومت میں ایسے مقدمات نمٹ نہیں سکتے تو پھر کہاں نمٹیں گے؟ یہ قومی سطح پر بدنما داغ ہے۔"

چیف جسٹس نے شاہین ملک سے کہا کہ وہ اپنی پی آئی ایل میں ایک درخواست دائر کریں اور بتائیں کہ یہ مقدمہ اب تک ختم کیوں نہیں ہوا۔ سی جے آئی نے یقین دہانی کرائی کہ عدالت اس پر از خود نوٹس (سو موٹو) بھی لے سکتی ہے۔ عدالت نے تمام ہائی کورٹس کی رجسٹری سے چار ہفتوں کے اندر تفصیلات پیش کرنے کو کہا ہے۔

سماعت کے دوران شاہین ملک نے متاثرین کی مشکلات پر روشنی ڈالتے ہوئے بتایا کہ کس طرح تیزاب حملوں کا شکار خواتین کھانے پینے کے قابل بھی نہیں رہتیں، بعض کو خوراک کے لیے مصنوعی نلکیوں کی ضرورت پڑتی ہے اور انہیں شدید معذوریوں کے ساتھ زندگی گزارنی پڑتی ہے۔ بنچ نے مرکزی حکومت سے اس درخواست پر بھی جواب طلب کیا کہ تیزاب حملے کے متاثرین کو فلاحی اسکیموں تک بہتر رسائی کے لیے معذور افراد کے زمرے میں شامل کیا جائے۔

سالیسیٹر جنرل تشار مہتہ نے عدالت کو یقین دہانی کرائی کہ اس مسئلے کو "سنجیدگی" سے لیا جائے گا اور کہا کہ مجرموں کے ساتھ "اسی سفاکی سے پیش آنا چاہیے جیسی انہوں نے کی ہے۔" چیف جسٹس نے مرکز سے کہا کہ وہ قانون میں ترمیم پر غور کرے، خواہ پارلیمنٹ کے ذریعے یا آرڈیننس کے ذریعے، تاکہ تیزاب حملے کے متاثرین کو باضابطہ طور پر حقوقِ معذوران ایکٹ کے تحت معذور افراد کی تعریف میں شامل کیا جا سکے۔ سی جے آئی نے مزید کہا کہ تیزاب حملے کے مقدمات میں تیز رفتار انصاف کو یقینی بنانے کے لیے زیرِ سماعت ایسے کیسز کو خصوصی عدالتوں میں سنایا جانا چاہیے۔