سہارنپور: جمعیت علمائے ہند کے جنرل سکریٹری مولانا محمد حکیم الدین قاسمی نے سہارنپور کی تاریخی کلکٹریٹ مسجد کے انہدام پر شدید تشویش کا اظہار کرتے ہوئے کہا ہے کہ متاثرہ فریق کو اپنے دفاع اور آئینی حقوق کے استعمال کا موقع دیے بغیر اچانک بلڈوزر چلانا کسی بھی صورت قابل قبول نہیں ہے۔ انہوں نے کہا کہ یہ معاملہ صرف کسی ایک مذہب یا برادری کا نہیں بلکہ قانون کی حکمرانی آئینی حقوق اور انصاف کے بنیادی اصولوں سے متعلق ہے۔
جمعیت علمائے ہند کے صدر مولانا محمود اسعد مدنی کی ہدایت پر تنظیم کا ایک اعلیٰ سطحی مرکزی وفد جنرل سکریٹری مولانا محمد حکیم الدین قاسمی کی قیادت میں سہارنپور پہنچا اور مسجد کے انہدام کے بعد پیدا ہونے والی صورت حال کا جائزہ لیا۔ وفد نے شہر کے ذمہ دار افراد قانونی ماہرین سیاسی و سماجی شخصیات اور جمعیت کے مقامی عہدیداروں سے ملاقات کرکے آئندہ کی حکمت عملی پر تبادلہ خیال کیا۔
وفد نے سابق رکن پارلیمنٹ حاجی فضل الرحمن موجودہ رکن پارلیمنٹ عمران مسعود اور اراضی سے متعلق مرحوم یعقوب خان کے پوتوں فیروز خان اور شاہ ہارون خان سمیت وکلا اور مقدمے سے وابستہ دیگر افراد سے بھی ملاقات کی۔ اس دوران مسجد کے انہدام ضلع انتظامیہ کے رویے اور دستیاب قانونی راستوں پر تفصیلی غور کیا گیا۔
مولانا حکیم الدین قاسمی نے کہا کہ معاملے سے متعلق دستاویزات اور شواہد جمع کیے جا رہے ہیں جنہیں جمعیت علمائے ہند کے صدر مولانا محمود اسعد مدنی کے سامنے پیش کیا جائے گا۔ ان کی ہدایت اور قانونی ماہرین سے مشاورت کے بعد آئندہ کا لائحہ عمل طے کیا جائے گا۔
انہوں نے کہا کہ جس عجلت کے ساتھ کارروائی کی گئی اس سے شہر کے لوگوں اور انصاف پسند شہریوں میں شدید بے چینی پیدا ہوئی ہے۔ عدالت سے رجوع کرنے کا حق محض رسمی سہولت نہیں بلکہ آئینی انصاف کا بنیادی حصہ ہے۔ انتظامی کارروائی اس انداز میں نہیں ہونی چاہیے کہ متاثرہ فریق کے لیے عدالت کا دروازہ کھٹکھٹانے کا موقع ہی ختم ہو جائے۔
مرکزی وفد نے وکلا کے ساتھ بھی خصوصی نشست کی جس میں دستیاب محصولات کے ریکارڈ تاریخی دستاویزات زمین کی ملکیت سے متعلق دعووں اور عدالتی کارروائی کے مختلف پہلوؤں کا جائزہ لیا گیا۔ جمعیت نے کہا کہ انصاف کے حصول کے لیے مضبوط دستاویزات اور دستیاب قانونی ذرائع کی بنیاد پر منظم قانونی جدوجہد ضروری ہے اور اعلیٰ عدالتوں سے رجوع کرنے کے امکانات پر غور کیا جا رہا ہے۔
مولانا حکیم الدین قاسمی نے کہا کہ جمعیت علمائے ہند انصاف کے ہر دستیاب قانونی راستے پر جائے گی اور سہارنپور کے لوگوں کو جہاں بھی قانونی مدد کی ضرورت ہوگی تنظیم ان کے ساتھ کھڑی رہے گی۔ انہوں نے کہا کہ ملک میں قانون کی نظر میں تمام شہری برابر ہیں اور عبادت گاہوں سمیت ہر شہری کے حقوق کا تحفظ جمہوری نظام کی بنیادی ذمہ داری ہے۔
انہوں نے سہارنپور کے شہریوں کی جانب سے مشکل حالات میں بھی امن اور باہمی بھائی چارہ برقرار رکھنے کو قابل تحسین قرار دیا اور تمام شہریوں سے اپیل کی کہ وہ امن و امان اور فرقہ وارانہ ہم آہنگی برقرار رکھتے ہوئے آئین اور قانون کے دائرے میں انصاف کی جدوجہد جاری رکھیں۔
مرکزی وفد میں مولانا قاسم نوری مولانا علی حسن مظاہری مولانا عظیم اللہ صدیقی مولانا محمد یوسف قاسمی اور حافظ ابوبکر ابن مولانا حکیم الدین قاسمی شامل تھے۔ مقامی سطح پر جمعیت علمائے ضلع سہارنپور کے صدر مولانا گلفام مظاہری جنرل سکریٹری مولانا سرتاج احمد قاسمی اور دیگر عہدیداران و ذمہ داران بھی موجود رہے۔
