نئی دہلی: بھارتیہ جنتا پارٹی (بی جے پی) کی رکن اسمبلی پونم شرما نے جمعہ کے روز اسمبلی کے بجٹ اجلاس کے دوران دہلی کا نام بدل کر "اندرپرستھ" رکھنے کا مطالبہ کیا۔ وزیرپور سے بی جے پی کی ایم ایل اے شرما نے ایوان کی کارروائی میں خصوصی ذکر کے ذریعے اپنی بات رکھی۔
انہوں نے کہا، "میں وزیر اعلیٰ ریکھا گپتا سے درخواست کرتی ہوں کہ وہ دہلی کا نام بدل کر اندرپرستھ کرنے کے لیے اسمبلی میں ایک تجویز منظور کریں اور اسے مرکز کی منظوری کے لیے بھیجا جائے۔ شرما نے کہا کہ دہلی کا شاندار ماضی مہابھارت کے دور سے جڑا ہوا ہے اور اس کے "ٹھوس ثقافتی اور تاریخی شواہد" موجود ہیں کہ دہلی پہلے اندرپرستھ کے طور پر موجود تھا۔
انہوں نے مزید کہا، "اندرپرستھ نام ہمیں اس دور کی یاد دلاتا ہے جب ہمارا ملک سونے کی چڑیا کے طور پر جانا جاتا تھا۔ نیا نام ملک کو ایک عظیم ثقافتی شناخت فراہم کرے گا۔" اس سے قبل چاندنی چوک سے بی جے پی کے رکن پارلیمنٹ پروین کھنڈیلوال نے بھی مرکزی وزیر داخلہ امت شاہ کو خط لکھ کر یہی مطالبہ کیا تھا۔
