نئی دہلی/ آواز دی وائس

دہلی چڑیا گھر میں ہمیشہ خبروں میں رہنے والا افریقی نر ہاتھی شنکر بدھ کی شام انتقال کر گیا۔ موت کی وجہ جاننے کے لیے تحقیقات کے احکامات دے دیے گئے ہیں۔ چڑیا گھر انتظامیہ نے جمعرات کو یہ اطلاع دی۔ انتظامیہ نے بتایا کہ شنکر کو 1996 میں زمبابوے نے ہندوستان کو تحفے میں دیا تھا اور 1998 میں وہ دہلی چڑیا گھر پہنچا تھا۔ انتظامیہ کے مطابق 29 سالہ شنکر نے بدھ کی صبح کم پتے اور گھاس کھائی تھی اور اسے ہلکا دست بھی تھا، لیکن وہ عام طور پر پھل اور سبزیاں لے رہا تھا۔

چڑیا گھر انتظامیہ نے بتایا کہ اس کی خوراک میں کمی اور دست ہونے کے بعد جانوروں کے طبی ماہرین کی ٹیم نے اس کا علاج کیا اور اسے پشوپالن عملے کی نگرانی میں رکھا، لیکن بدھ شام 7:25 پر وہ اچانک اپنے شیڈ میں گر گیا اور ایمرجنسی علاج کے دوران اس کی موت ہو گئی۔

۔16 ستمبر تک مکمل صحت مند تھا شنکر

انتظامیہ کا کہنا ہے کہ 16 ستمبر تک شنکر میں کسی بیماری یا غیر معمولی رویے کی کوئی رپورٹ نہیں تھی۔ اسی لیے اس کی موت کے اسباب جاننے کے لیے ہندوستانی پشوچکتسا انوسندھان سنستھان، بریلی کے ماہرین، ہیلتھ ایڈوائزری کمیٹی اور وزارتِ ماحولیات، جنگلات و ماحولیاتی تبدیلی کے نمائندوں کی موجودگی میں پوسٹ مارٹم کیا جا رہا ہے۔

۔2002 سے اکیلا رہ رہا تھا شنکر

چڑیا گھر میں کام کرنے والے ملازمین بتاتے ہیں کہ شنکر 2002 میں اکیلا رہ گیا تھا جب اس کی ساتھی وِمبائی کا انتقال ہو گیا۔ ومبائی کی موت کسی انفیکشن کی وجہ سے ہوئی تھی۔ اس کے بعد شنکر نے کھیلنا کودنا چھوڑ دیا اور گزشتہ 13 برس سے وہ تنہا چڑیا گھر میں رہ رہا تھا۔ دہلی چڑیا گھر نے کئی بار زمبابوے اور بوٹسوانا کی حکومتوں سے شنکر کی ساتھی لانے کے لیے بات چیت کی لیکن کوئی نتیجہ نہیں نکلا اور بالآخر بغیر ساتھی کے ہی شنکر کی موت ہو گئی۔

دہلی ہائی کورٹ میں شنکر کی رہائی کے لیے درخواست

شنکر کو طویل عرصے سے رویے میں تناؤ کا سامنا تھا جس کی بڑی وجہ اس کا اکیلا پن تھا۔ اس کے غصے کی وجہ سے اسے دوسرے ایشیائی ہاتھیوں سے بھی الگ کر دیا گیا تھا۔ حالات اس قدر خراب ہو گئے تھے کہ شنکر کو زنجیروں سے باندھ کر رکھنا پڑا۔ سال 2022 میں ایک جانوروں سے محبت کرنے والے شخص نے دہلی ہائی کورٹ میں شنکر کی رہائی کے لیے درخواست بھی دائر کی تھی۔

وہ دہلی چڑیا گھر میں ومبائی کے ساتھ کھیلتے کودتے بڑا ہوا تھا۔ شنکر اور ومبائی کی محبت کی کہانی کافی مشہور ہوئی تھی اور وہ دونوں سیاحوں کے لیے کشش کا مرکز بن گئے تھے۔