نئی دہلی/ آواز دی وائس

دہلی اب بھی مانسون کی پہلی بارش کا انتظار کر رہی ہے۔ محکمہ موسمیات دہلی میں مانسون کی آمد کی پیش گوئیوں میں بار بار ناکام ہو رہا ہے۔ پہلے یہ کہا گیا تھا کہ مانسون 25 جون کو دہلی پہنچے گا، پھر تاریخ بدل کر 22 جون کر دی گئی۔ 22 جون کے بلیٹن میں دعویٰ کیا گیا کہ اگلے تین دن میں مانسون آ جائے گا۔ 25 جون کو پیش گوئی ہوئی کہ اگلے 36 گھنٹوں میں مانسون دہلی میں داخل ہو جائے گا، مگر اب لگ رہا ہے کہ مانسون تاخیر سے دہلی میں داخل ہوگا۔

امکان ہے کہ اگلے تین سے چار دنوں میں مانسون دہلی سمیت ملک کے باقی حصوں میں بھی اپنی دستک دے گا۔ قابل ذکر بات یہ ہے کہ دہلی کے لیے محکمہ موسمیات کی اب تک کی چھ پیش گوئیاں غلط ثابت ہو چکی ہیں۔

ملک کے بیشتر حصوں میں اس بار مانسون وقت سے پہلے پہنچ چکا ہے۔ دہلی میں بھی 22 جون کو اس کی آمد کی امید تھی، مگر آج بھی اس کی آمد غیر یقینی ہے۔ سوال یہ ہے کہ بادلوں کی موجودگی کے باوجود دہلی میں بارش کیوں نہیں ہو رہی؟ پچھلے ویک اینڈ تک بارش کی زوردار شروعات کی امید تھی، لیکن اس وقت مانسون جیسے تھما ہوا ہے۔ راجستھان، ہریانہ، پنجاب اور مغربی اتر پردیش میں مانسون پہنچ چکا ہے، مگر دہلی اب بھی اس کی منتظر ہے۔

بادل موجود، مگر بارش نہیں — وجہ کیا ہے؟

پرائیویٹ موسمی ایجنسی اسکائی میٹ ویدر کے مطابق، دہلی میں بادل، نمی اور ہوائیں جیسی مانسونی حالتیں موجود ہیں، لیکن اس کے باوجود بارش نہیں ہو رہی۔ مانسونی ہوائیں اتراکھنڈ کی ترائی اور اراولی کے درمیان پھنس گئی ہیں، جس کی وجہ سے دہلی تک ان کا اثر نہیں پہنچ پا رہا۔

عرب سمندر اور خلیج بنگال کے دونوں جانب چکر دار ہوائیں بنی ہوئی ہیں۔ ان سے جڑی ایک "ٹرف لائن" وسطی ہندوستان سے گزر رہی ہے، لیکن وہ دہلی سے خاصی دور ہے، اسی لیے اس کا سیدھا اثر دہلی پر نہیں پڑ رہا۔

آج ہلکی بارش کا امکان، 28 جون سے بارش تیز ہو سکتی ہے

فی الحال مغربی ہوا کا ایک سسٹم شمالی پاکستان اور پنجاب کے قریب فعال ہے، جو ٹرف لائن کو دہلی کی طرف کھینچنے کی کوشش کر رہا ہے۔ اس کی وجہ سے آج دہلی میں ہلکی بارش کا امکان ہے، جبکہ 27 سے 29 جون کے درمیان بارش کی سرگرمیاں بڑھ سکتی ہیں، خاص طور پر 28 جون کو۔ مانسونی ہوائیں دہلی کے قریب پہنچ چکی ہیں، لیکن کسی مضبوط محرک کے نہ ہونے کی وجہ سے وہ پوری طرح سرگرم نہیں ہو رہیں۔ امید ہے کہ مانسون کی سست لیکن مستحکم شروعات ہوگی اور اگلے ہفتے کے آغاز میں اچھی بارش ہو سکتی ہے۔

محکمہ موسمیات کے مطابق، دہلی کا کم سے کم درجہ حرارت 28.6 ڈگری رہا، جو معمول سے 0.7 ڈگری زیادہ ہے، جبکہ زیادہ سے زیادہ درجہ حرارت 34 ڈگری تک رہنے کا امکان ہے۔ اس پورے ہفتے تیز بارش کا امکان کم ہے، البتہ ایک یا دو دن تیز بونداباندی ہو سکتی ہے۔

آج دہلی کا موسم کیسا رہے گا؟

جمعرات کو دہلی کا زیادہ سے زیادہ درجہ حرارت 38 ڈگری رہا، جو معمول سے 0.8 ڈگری زیادہ تھا، جبکہ کم سے کم درجہ حرارت 28.6 ڈگری رہا۔ ہوا میں نمی کا تناسب 54 سے 85 فیصد کے درمیان رہا۔ پیش گوئی کے مطابق، جمعہ کو آسمان جزوی طور پر ابر آلود رہے گا اور شام کے وقت ہلکی بارش کے ساتھ آندھی کا امکان ہے۔

۔28 سے 30 جون کے درمیان درمیانی درجے کی بارش ہو سکتی ہے۔ خاص طور پر 28 جون کی شام سے بارش کی سرگرمیاں شروع ہونے کی امید ہے۔ اس دوران زیادہ سے زیادہ درجہ حرارت 33 سے 38 ڈگری اور کم سے کم 25 سے 28 ڈگری سیلسیس کے درمیان رہ سکتا ہے۔