نئی دہلی/ آواز دی وائس
دہلی حکومت فضائی آلودگی کو کم کرنے کے لیے مختلف اقدامات اٹھا رہی ہے۔ اسی سلسلے میں حکومت نے ایک اہم اور سخت قدم اٹھاتے ہوئے گاڑی مالکان کے لیے نیا ضابطہ نافذ کیا ہے۔ اس کے تحت 1 جولائی 2025 سے دہلی-این سی آر میں رجسٹرڈ 10 سال سے پرانی ڈیزل اور 15 سال سے پرانی پٹرول گاڑیوں کو ایندھن فراہم نہیں کیا جائے گا۔
حکومت نے 500 سے زائد پٹرول پمپوں پر آٹومیٹک نمبر پلیٹ ریکگنیشن کیمرے نصب کیے ہیں جو پرانی گاڑیوں کی شناخت کریں گے، اور قانون کی خلاف ورزی کرنے والوں کے خلاف کارروائی کی جائے گی۔ یہ اقدام دہلی میں فضائی معیار کو بہتر بنانے کے لیے اٹھایا گیا ہے۔
سی اے کیو ایم کا واضح پیغام
کمیشن فار ایئر کوالٹی مینجمنٹ نے جمعہ کے روز واضح کیا کہ آپریشن کی مقررہ مدت مکمل کر چکی کسی بھی گاڑی کو 1 جولائی 2025 سے دہلی میں ایندھن نہیں دیا جائے گا۔ سی اے کیو ایم نے کہا کہ ہندوستان کے کسی بھی ریاست میں رجسٹرڈ 10 سال پرانی ڈیزل گاڑیاں اور 15 سال پرانی پٹرول گاڑیاں اس حکم کے دائرے میں آئیں گی۔
پرانی گاڑیوں کی شناخت کیسے ہوگی؟
سی اے کیو ایم نے اپریل میں پٹرول پمپوں کو ہدایت جاری کرتے ہوئے کہا تھا کہ 1 جولائی سے مدت مکمل کر چکی کسی بھی گاڑی کو ایندھن نہ دیا جائے۔ دہلی کے 520 ایندھن مراکز میں سے 500 پر اے این پی آرکیمرے نصب کر دیے گئے ہیں، باقی پر 30 جون تک کیمرے لگا دیے جائیں گے۔
ان کیمروں کے ذریعے 10 سال (ڈیزل) یا 15 سال (پٹرول) سے زائد پرانی گاڑیوں کی نشاندہی کی جائے گی۔ جیسے ہی کوئی ایسی گاڑی شناخت ہوگی، کمانڈ سینٹر اور ٹریفک و ٹرانسپورٹ ڈیپارٹمنٹ کے افسران کو الرٹ بھیجا جائے گا اور گاڑی کو ضبط کر لیا جائے گا۔
دہلی سے متصل علاقوں میں بھی ہوگی سختی
یہ نظام اس سال 1 نومبر سے دہلی سے ملحق پانچ زیادہ گاڑیوں والے اضلاع گروگرام، فریدآباد، غازی آباد، گوتم بدھ نگر، اور سونی پت میں بھی نافذ کیا جائے گا۔ ان علاقوں میں اے این پی آر کیمرے 31 اکتوبر تک نصب کر دیے جائیں گے۔ باقی ماندہ این سی آر اضلاع کو 31 مارچ 2026 تک کا وقت دیا گیا ہے۔ وہاں پرانے گاڑیوں کو ایندھن دینے پر پابندی 1 اپریل 2026 سے نافذ ہوگی۔
دہلی کے باہر سے آنے والی گاڑیاں بھی دائرے میں
سی اے کیو ایم کے ٹیکنیکل ممبر ویرندر شرما نے کہا کہ ہدایات میں یہ نہیں کہا گیا کہ صرف دہلی میں رجسٹرڈ پرانی گاڑیوں کو ہی ایندھن سے محروم رکھا جائے گا۔ دہلی-این سی آر کے باہر رجسٹرڈ گاڑیاں بھی دہلی کی سڑکوں پر چلتی ہیں اور آلودگی میں حصہ ڈالتی ہیں۔ اگر دہلی کے لوگ اپنی گاڑیاں دوسرے علاقوں میں رجسٹر کراتے ہیں تو اُنہیں بھی روکا جائے گا۔
افسر نے بتایا کہ اس سسٹم کے ذریعے ہندوستان میں کہیں بھی رجسٹرڈ پرانی بسوں کی بھی نشاندہی کی جائے گی۔ البتہ دہلی-این سی آر میں ان کی نقل و حرکت پر قابو پانے کے لیے الگ ہدایات جاری کی جائیں گی۔
دہلی میں 62 لاکھ سے زائد پرانی گاڑیاں
سی اے کیو ایم کے مطابق، دہلی میں 62 لاکھ ایسی گاڑیاں ہیں جو آپریشن کی اپنی مدت مکمل کر چکی ہیں، جن میں 41 لاکھ دو پہیہ گاڑیاں ہیں۔ پورے این سی آر میں ایسی گاڑیوں کی تعداد تقریباً 44 لاکھ ہے، اور ان میں سے زیادہ تر گاڑیاں ان پانچ اعلیٰ گاڑی گھیراؤ والے اضلاع میں مرکوز ہیں۔
