نئی دہلی/ آواز دی وائس

یومِ آزادی کے موقع پر لال قلعہ کے آس پاس سمیت دارالحکومت کے کئی علاقوں میں ٹریفک متاثر رہے گی۔ ٹریفک پولیس کے مطابق 14 اگست کی رات 12 بجے سے لال قلعہ کے آس پاس کی سڑکوں پر ٹریفک بند کر دیا جائے گا۔ یہ پابندی 15 اگست کو دوپہر تک برقرار رہے گی۔ ٹریفک پولیس نے عوام سے اپیل کی ہے کہ اس دوران لال قلعہ، انڈیا گیٹ سمیت نئی دہلی کے ممنوعہ علاقوں کی سڑکوں پر جانے سے گریز کریں۔

پولیس کے مطابق یہ قدم حفاظتی وجوہات کی بنا پر اٹھایا گیا ہے۔ 14 اگست کی دوپہر سے 15 اگست کی دوپہر تک نظام الدین پل اور وزیرآباد پل پر بھاری گاڑیوں کی آمد و رفت پر پابندی رہے گی۔ اسی کے ساتھ سرائے کالی خان آئی ایس بی ٹی اور مہارانا پرتاپ آئی ایس بی ٹی کے درمیان بین الریاستی بس سروس بھی معطل رہے گی۔

ان سڑکوں پر پابندی رہے گی

لال قلعہ، آئی ٹی او اور دہلی گیٹ کی جانب صرف لیبل والی گاڑیوں کو جانے کی اجازت ہوگی۔ انڈیا گیٹ کے آؤٹر سرکل کے کئی حصوں میں صبح کے وقت ٹریفک بند رہے گا۔ نیتاجی سبھاش مارگ پر دہلی گیٹ سے چھتا ریل تک، لوہتیان روڈ پر جی پی او سے چھتا ریل تک، ایس پی مکھرجی مارگ پر ایچ سی سین مارگ سے جمنا بازار چوک تک، چاندنی چوک کے فوارہ چوک سے لال قلعہ تک، نشاد راج مارگ پر رنگ روڈ سے نیتاجی سبھاش مارگ تک، ایسپلینیڈ روڈ، نیتاجی سبھاش مارگ اور رنگ روڈ پر راج گھاٹ سے آئی ایس بی ٹی تک گاڑیوں کی آمد و رفت 15 اگست کو دوپہر تک بند رہے گی۔

وقت سے پہلے نکلنے کا مشورہ

اس دوران شمال سے جنوب جانے کے لیے لوگ صفدر جنگ روڈ، اروِندو مارگ، کوٹیلیہ مارگ، مدر ٹریسا کریسنٹ، کمال اتاترک مارگ، 11 مورتی، مندر مارگ، پنچکویان روڈ اور رانی جھانسی روڈ کا استعمال کر سکیں گے۔ ریلوے اسٹیشن، بس اڈے اور ہوائی اڈے جانے والے مسافروں کو وقت سے پہلے نکلنے کا مشورہ دیا گیا ہے۔ ساتھ ہی ٹریفک جام سے بچنے کے لیے عوام کو پبلک ٹرانسپورٹ استعمال کرنے کی ہدایت دی گئی ہے۔ مشرق سے مغرب کے درمیان آمد و رفت کے لیے این ایچ 24، نظام الدین کھتہ، بارا پُلا روڈ، ایمس فلائی اوور اور رنگ روڈ کے راستے راجہ گارڈن تک جا سکیں گے۔

چھترسال اسٹیڈیم کی طرف جانے سے گریز کریں

چھترسال اسٹیڈیم میں بھی یومِ آزادی کا پروگرام منعقد ہوگا، جو دہلی حکومت کی جانب سے رکھا گیا ہے۔ اس کے لیے بھی ٹریفک ایڈوائزری جاری کی گئی ہے۔ اس پروگرام میں وزیر اعلیٰ ریکھا گپتا قومی پرچم لہرائیں گی۔ علاقے میں ہجوم کے امکان کے پیش نظر صبح 6 بجے سے آس پاس کے علاقوں میں ٹریفک پابندیاں نافذ کر دی گئی ہیں۔

اس پروگرام کے دوران چھترسال اسٹیڈیم پر ڈائیورژن رہے گا، جس میں کنگز وے کیمپ چوک، حقیقت نگر نالہ روڈ، یو-ٹرن بھاماشاہ چوک، ماڈل ٹاؤن-2، ماڈل ٹاؤن-3، اسٹیڈیم روڈ، نانک پیاؤ گردوارہ، جی ٹی کے روڈ ٹی پوائنٹ شامل ہیں۔ پولیس نے مال روڈ (رنگ روڈ، چھترسال اسٹیڈیم کے قریب)، اسٹیڈیم روڈ، برہما کماری مارگ، اولڈ جی ٹی کرنال روڈ اور بھاماشاہ روڈ پر جانے سے گریز کرنے کی ہدایت دی ہے۔